ИНТЕРВЈУ
Итно е потребна измена на Генералниот план
Зелениот пазар ќе ги задоволи сите, смета кандидатот за градоначалник на Центар од ВМРО-ДПМНЕ, Владимир Тодоровиќ
Деспина Трајковска
Имате ли сознанија во каква состојба ќе ја наследите Општината и врз основа на тоа ќе ги определите приоритетите во првите месеци?
Се' уште постојат делови во општината во кои треба многу да се инвестира во инфраструктурни зафати, што сметам да го изведам за кусо време. Генерално, што поскоро треба да се реши проблемот со паркирањето и нехигиената. Има улици преполни со дупки, прекопани повеќе пати, населби во кои канализациите немаат капацитет, па неопходна е нивна надградба, или целосна нова мрежа. Недозволиво е и маџирмаалци да живеат со септички јами. Така што ќе инсистирам за пет-шест месеци да се изврши измена на ГУП на Скопје и во него да се дислоцира булеварот „Крушевска република“ предвиден со сегашниот план, а со кој не се согласуваат жителите на Маџир Маало. Потоа, општината ќе изработи нов ДУП усогласен со ГУП-от. Исто така, со Коце Трајановски ќе го смениме и планот кој предвидува проширување на „Илинденска“, оти нема простор за проширување од Владата до фонтаната, туку само од фонтаната кон Карпош.
Покрај проектите што планирате да ги реализирате со помош на Владата и Градот, кои проекти би ги издвоиле како чисто општински?
За решавање на проблемите со паркирањето ќе поставиме монтажни катни гаражи, сразмерно на слободниот простор, пред „Лотарија“, кај „Холидеј ин“, во Капиштец, а има услови и за подземно паркирање под плоштадот во центарот. Со принципот на јавно - приватно партнерство, или преку приватно-приватно партнерство ќе ја разгледаме можноста за изградба на нова општинска зграда. Но, тоа не е во мојата приоритетна програма за работа.
Што ќе правите со Зелениот пазар? Последниот ДУП предвидува негова дислокација, граѓаните се поделени!
Планот ќе го ставам на ревидирање со намера да се смени. И Советот ќе го убедам да има енергија и желба да го смени тоа, а ќе се бара согласност и од „Скопски пазар“, бидејќи земјиштето е негово. Зелениот пазар е проблем за жителите, почнувајќи од нехигиената, бучавата, оневозможениот пристап до нивните домови. Значи, трите страни, сопственикот „Скопски пазар“, тезгаџиите и жителите треба да се задоволат, а тоа е навидум тешко. Но, ќе имам средба со СП и ќе му понудам нешто да го привлече. Значи, во делот на пазарот една петтина да се ископа, ќе се направи подземен паркинг, а приземјето ќе се покрие и ќе се изгради парк. Сета работа ќе се изведе етапно, со цел да не се затвори пазарчето и тоа ќе трае со години. На крајот ќе добиеме паркинг низ цела основа, приземје на кое ќе бидат тезгите, а одозгора ќе има парк.
Кога сме кај пазарите, и Цветен пазар треба да се дислоцира. Што ќе стане со тие пазарџии?
На местото на Цевтниот пазар има маркичка за објект со ознака дека постои пазар. На местото кај „Тинекс“, пак, спроти дирекцијата на „Макпетрол“, постои катна гаража. Јас не сум за гаража со висина од осум до девет ката, јас сум повеќе за катна гаража на четири до пет ката, а приземјето да се користи за некаква комерцијална содржина. Ако не успееме да го убедиме Советот да го врати планот, тоа што пишува пазар на Цветниот пазар, бидејќи е мал, можеби една третина од сегашниот Зелен пазар, да се зголеми кон „Тинекс“ и во целата таа должина да се обезбеди толкава површина во основа колку што е Зелениот пазар. Тој е од затворен тип.
Размислувате ли да ја искористите можноста за формирање општински јавни претпријатија и дали постојното ЈП „Паркинзи на општина Центар“ функционира во интерес на граѓаните?
Сметам дека е неопходна реорганизација на претпријатието во поглед на неговата програма за работа. Паркинзи се прават и таму каде што нема техничка можност. Истовремено, сметам дека тоа треба да биде 95 отсто во функција на самите жители од зградите ако не и стопроцентно, што сега не е случај. Треба да се направи анализа на оправданоста на веќе отворените паркинзи. Од друга страна, пак, не сум застапник на идејата општините да отвораат свои ЈП бидејќи бараат значителни средства за плати, просторни услови, а тоа не може да се обезбеди, бидејќи ретко кое ЈП работи со голем профит. Сметам дека ЈП кои се во надлежност на Градот имаат доволен капацитет за сите потреби и услуги.
Дали се согласувате со урбанистичката визија за плоштадот и неговата околина?
Апсолутно сметам дека на центарот му се потребни споменици, фонтани, нови градби кои ќе му дадат соодветен белег. Сегашниот лик на плоштадот нема душа, нема ништо препознатливо. И најавуваниот споменик на Александар Македонски и фонтаните во Вардар и десетиците скулптури ќе го заживеат Скопје во секоја смисла, и урбанистички, а особено ќе придонесат за развој на туризмот.
Доколку бидете градоначалник, каква соработка очекувате со Советот, каде што мнозинството е во рацете на опозицијата? Очекувате ли опструкции?
Мора да бидам искрен и да кажам дека во прво време очекувам таква несоработка. Но, најважен е интересот на граѓаните. Не може никој, па ниту јас, да се однесува крајно нерационално на штета на граѓаните. Освен тоа, мојот стил на менаџирање и во приватна компанија е многу респектабилен спрема туѓите идеи и предлози. И ако му кажете некому дека ги респектирате неговите размислувања, ако покажете дека не сте вие од другата страна закоравен и затворен, тогаш и тој е подготвен на соработка. Сум работел и во многу невладини здруженија и луѓето ме прифатиле како контактибилен, флексибилен и подготвен за соработка. Очекувам така да биде и сега. Прво, верувам дека луѓето нема да се однесуваат нерационално, без разлика дали ме напаѓале или не. Ќе им дадам многу од работите да ги изградат сами. Јас ќе партиципирам за некои работи, затоа што тие ќе имаат некаква идеја која ќе мора да се поттикне од градоначалникот како иницијатива. |
