Антикорупциска комисија, засега, ќе молчи за признанието на Иванов
Државната комисија за спречување корупција, засега, нема да го каже својот став за јавното признавање на Ѓорге Иванов дека му ги собрал потписите на Нано Ружин. Главната причина за тоа е нивниот став да не влијаат врз одлуката на избирачите.
„Имавме претставка од СДСМ што се однесува на изјавата на претседателскиот кандидат Иванов во врска со собирањето потписи за друг кандидат, во случајот Ружин. Но, Државната комисија се' уште нема причини јавно да го соопшти својот став. Режимот врз основа на кој работиме започна на 10 јануари, значи со распишување на изборите, а завршува со денот на конституирање на новите органи. Токму поради чувствителноста на прашањето, кое може во овој период да се сфати како порака, влијание врз избирачите, нема да го соопштиме нашиот став“, рече на вчерашната прес-конференција претседателката на ова тело, Мирјана Димовска.
Што се однесува до другата претставка од СДСМ, во врска со изборот на ректор на универзитетот во основање за информатички технологии, Антикорипциска и пред реакцијата на партијата укажала дека не треба да се врши избор. Наедно, добиле и писмено известување од матичната комисија за формирање на овој универзитет дека е запрена постапката.
Според Димовска, Владата до денес треба да достави информација за почетокот на изградба на објектите за кои премиерот и министрите поставуваа камен-темелници. По нивната последна ургенција од пред два дена, од Владата вчера стасала информација до антикорупционерите дека до денес ќе биде доставена комплетна документација.
На новинарското прашање дали Комисијата не смета дека со ваквиот потег Владата не ја сфаќа сериозно оваа институција, па податоците што се бараат од неа ќе ги достави, најверојатно, по завршувањето на изборите и ќе ја постигне целта дека нешто работи, Димовска рече дека тие постапуваат по фактографска документација и никако поинаку.
Државната комисија соопшти и дека од распишувањето на изборите, работи по 364 предмети, од кои 180 се огласи за вработувања или избор за 1.280 вработувања, продажба и издавање недвижен имот - шест случаи, јавни набавки - четири случаи и четири останати случаи. Антикорупциска се обратила во 192 случаја да се спроведе режимот што произлегува од Законот за спречување корупција.
Во 70 отсто од случаите, укажувањата биле спроведени, додека во десетина случаи имало елементи за надлежно прекршочно постапување на Државната комисија за спречување корупција. (П.Р.) |
