Претходен број

Антикорупционерите повторно му се закануваат на Костовски

Од ДКСК се закануваат со кривична одговорност за Костовски доколку потпише непосредна спогодба

Деспина Трајковска

Ниту Антикорупциската комисија ниту, пак, градоначалникот Трифун Костовски не се откажуваат од проектот за трамвај во Скопје. Антикорупционерите од напорите за негова блокада, на што се особено горди, а пак Костовски од потрага по фирма што ќе почне да го гради депото, трамвајските шини, а и ќе набави едно трамвајско возило. Антикорупционерите повторно вчера му се заканија на Костовски со кривична одговорност доколку ги оствари најавите и со непосредна спогодба потпише договор со фирма-изведувач на проектот, па дури и изразија сомневања во неговите напори за реализација на трамвајскиот систем.

„Проектот се турка по секоја цена, се сака да се постигне цел. Политичка очигледно не, туку материјална, што е апсолутно на повидок. Ако Костовски продолжи и го потпише договорот, тој би бил подложен на поништување и одговорност“, изјави вчера Мирјана Димовска, претседателка на Антикорупциската комисија, која оцени дека евентуалното користење на член 99 од Законот за јавни набавки би било правно неиздржано, зашто, како што кажа, тендерот е стопиран поради незаконитост, а не е пропаднат затоа што ниту една од 17-те заинтересирани компании не доставила понуда.

Од Кабинетот на Костовски вчера најавија дека денеска градоначалникот подетално ќе ја информира јавноста за сите досегашни преземени активности, а наедно и ќе ги демантира сомнежите на Димовска за негова наводна материјална корист од идејата за трамвајот.

„Во изминатите четири години Костовски покажа што е домаќинско работење. Изјавите на Димовска се повеќе од ирационални, а Костовски и покрај се' размислува за избор на фирма со непосредна спогодба, одлука за која пресудно ќе му биде и мислењето на скопјани“, накусо рекоа од Кабинетот на скопскиот градоначалник.

Инаку, иако повторениот тендер за владината набавка на 302 двокатни автобуси за Скопје беше пуштен на 13 март, во екот на изборната кампања, антикорупционерите дури вчера информираа дека Министерството за транспорт и врски треба да запре со постапката. Од Комисијата демантираа дека тие им укажале на надлежните оти изборниот процес не е пречка за спроведување на тендерот. Дополнија и дека Министерството воопшто не се консултирало со нив.

„До Министерството е пуштен режимот на постапување во врска со тендери за јавни набавки со барање да ја провериме документацијата. Во нашето укажување стои дека овој тендер треба да се запре додека не го провериме“, изјави Димовска, која отфрли двојни аршини на Комисијата во случајот со трамвајот и тендерот за двокатните автобуси.

Токму таква ситуација во случајов гледа градоначалничкиот кандидат за Скопје, Тито Петковски. Според него, ДКСК има двојни аршини за исти постапки и активности на Владата и Градот Скопје. Според Петковски, на ваков начин Владата преку Антикорупциската комисија прави упад во работата на Градот што, според него, покажува како ја сфаќаат улогата на локалната самоуправа. Петковски на вчерашна прес-конференција најави дека НСДП по изборите во Собранието ќе поднесе иницијатива за разрешување на членовите и претседателот на Комисијата.