Маневски го фали судството, судиите загрижени за буџетот
Жаклина Хаџи-Зафирова
Судовите во Македонија минатата година ја почнале со 1.093.552 предмети, што е за 8,2 отсто повеќе во споредба со претходната година. Буџетот за судовите лани бил помал за 15 отсто, за што од судската власт апелираат дека е можно во иднина да се соочат со тешкотии. Од идниот месец ќе почне и оценувањето на судиите. Овие факти, кои ги загрижија судиите, вчера беа во сенка на пофалбите кои стасаа од првиот човек во Министерството за правда, министерот Михајло Маневски, кој рече дека судството прв пат во седумнаесет години се менува на подобро. Платите во судството растат, се намалува бројот на предметите, тие се решаваат ефикасно, а неколку судови се од корен реновирани, набројуваше вчера министерот Маневски додека се разгледуваа годишните извештаи за работата на судовите.
Според анализата на Врховниот суд, повеќето судови успеале да го совладаат приливот на нови предмети, со исклучок на Основниот суд Скопје 2, апелационите и Управниот суд. „Во 2007 останале нерешени 1,17 милиони предмети, а на крајот на 2008 година останале нерешени 944.721 предмет, што е за 19,5 отсто помалку“, се вели во извештајот што го презентираше Врховниот суд.
Министерот за правда смета дека сега во судството има поефикасни резултати во споредба со ситуацијата пред седумнаесет години. Според него, индикатор за добрата работа на судовите е и враќањето на довербата на граѓаните во судството, што го покажало истражувањето на УСАИД, каде што 78 отсто од граѓаните ја дале довербата на судовите. Министерот се пофали и дека прв пат се води сметка и за условите во судовите, за што посочи дека во десетина судови се направени коренети реновирања. Тој нагласи дека и платата на судската администрација е покачена за 55 проценти во претходниот период.
„Очигледно дека судовите се престројуваат и се создаваат основни претпоставки за поефикасно работење. Тоа го предвидуваме и во новите закони што ги подготвуваме“, рече Маневски. Маневски, притоа, ги посочи законите за платите на судиите и за судовите според кои ќе се вреднува работата на судиите.
„На тој што ќе биде оценуван дека две години едноподруго се истакнува наредната плата еднократно може да му биде покачена до 70 проценти. Додека, има определени мерки со кои ќе се коригира однесувањето оној што по оцена на Судскиот совет нема да покажува резултати“, изјави министерот.
|
