Златна плакета за КУД „Гоце Делчев“ во Италија

Ансамблот за народни песни и ора „Гоце Делчев“ неодамна реализираше уште едно успешно гостување во Сицилија, Италија, од каде што се врати со специјално признание „Златна плакета“ на градот Кастрореале. Игроорците, оркестарот и женската вокална група „Сирма“ учествуваа на Меѓународн��от фолклорен фестивал што се одржа од 15 до 26 август, каде што на високо уметничко ниво претставиле дел од македонскиот фолклор. Покрај Кастрореале, ансамблот одржал концерти и во градовите Мацара, Сент Андреа, Фондачели фантина, Бафија, Пјаце дел мела, а заедно со ансамблите на Полска, Естонија и Италија, КУД „Гоце Делчев“ учествуваше и на дефилеата во Кастрореале и Бафија.

„Фестивалот, велат учесниците, иако немаше натпреварувачки карактер, стручната критика и средствата за информирање посебно го нагласија настапот на виртуозите од Македонија и како резултат на покажаните уметнички вредности повторно сме поканети да настапиме во Италија во 2011 година на Големиот меѓународен фолклорен фестивал, кој се одржува во Агриџенто на Сицилија“. Македонските фолклористи добиле покана да гостуваат и во Полска. (Н.П.)