Предземјотресни потреси во албанскиот кампус
ДУИ е во најнезавидна положба поради внатрепартиските и меѓукоалиционите проблеми
Светлана Унковска
Превирањата со изборот на ректорот на Државниот тетовски универзитет, покрај тоа што ги заостри односите меѓу Универзитетот и Министерството за образование и наука, ги обнови и меѓупартиските пресметки меѓу ДУИ и ДПА за преземање на раководството, а во нив се вклучи и Нова демократија. Раздвижувања во блокот партии на Албанците, секако, предизвика и предлогот за нов договор меѓу Македонците и Албанците од страна на ДПА. Иако беше отфрлен и оценет како непотребен од сите политички субјекти, експерти, но и од претставниците на меѓународната заедница, сепак, од договорот не се откажаа во партијата на Мендух Тачи. Викендов документот беше претставен и прифатен од највисоките органи на партијата. Претходно трите партии на Албанците во парламентот жестоко се скараа и околу донесувањето на новиот Закон за Собранието и тоа во делот за употребата на албанскиот јазик.
Сепак, најновите случувања со поставувањето ректор на ДУТ од страна на Министерството за образование и наука, а истовремено и од страна на Сенатот на Универзитетот, го повторува сценариото од времето на именувањето на поранешниот ректор Сади Беџети, кога ДУИ и ДПА имаа жестоки судири и обвинувања. Тогаш од партијата на Ахмети именувањето на Беџети за ректор го оценија како насилнички упад на ДПА во автономијата на Универзитетот. Сега лидерот на ДПА, Мендух Тачи, кој овој пат се најде од другата страна, оцени дека со ваквиот потег на именување ректор од страна на Министерството се врши класична окупација на Универзитетот како од времето на Милошевиќ. Имер Селмани, пак, од Нова демократија најави дека за одлуката ќе поднесат претставка до Уставниот суд за нејзино преиспитување. Од ДУИ ги отфрлија обвинувањата дека именувањето на ректорот има некаква политичка вмешаност. Според професорот Хасан Јашари, политиката треба да се тргне од Универзитетот и треба да престанат упадите на политичките моќници и групи.
„Решението е во тоа да биде поставена силна академска личност, која ќе биде неутрална од овие групи и состојбите да се средат низ дијалог со академскиот кадар. ДУИ е во комплицирана ситуација и треба многу претпазливо да се прават следните чекори, затоа што, сепак, станува збор за интерес на студентите и академскиот живот“, вели професор Јашари.
Покрај искричењата со Тетовскиот универзитет, но и воопшто од севкупната атмосфера во државава, се чини дека од трите партии на Албанците, ДУИ е во најнезавидна позиција. Освен што има внатрепартиски проблеми од се' поголемото незадоволство на членството поради начинот на кој функционираат како коалиционен партнер во Владата, предводена од ВМРО-ДПМНЕ, барањето начини како да се добие улогата на рамноправен партнер во власта, потоа од се' погласните пораки кои ги добиваат од граѓаните, но и секојдневните напади и критики од страна на опозицијата. Истовремено, и претстојните случувања што се најавуваат со реконструкцијата на Владата уште повеќе ги заоструваат односите во партијата на Али Ахмети, каде што веќе подолго време врие.
ДПА, пак, самоуверено и упорно го турка новиот договор на Македонците и Албанците, претставувајќи го како единствен спас за иднината на државата и истовремено обвинувајќи ја ДУИ дека не го имплементира Охридскиот договор. И покрај тоа што евроамбасадорот Ерван Фуере јасно му порача дека нема место за нови договори, затоа што, како што рече, „патот на Македонија кон ЕУ води преку Охрид“, документот беше претставен и прифатен од Централното претседателство и од Централниот одбор на ДПА.
Во Нова Демократија се' посилно и позабрзано се работи на зајакнување на партиската инфраструктура и мотивирање на партиското членство. Најавите дека е можно во партијата на Селмани да преминат и градоначалниците на Тетово и на Гостивар, Сади Беџети и Руфи Османи, дополнително ги вознемирија духовите во ДУИ и во ДПА. |
