Македонците во Албанија не гласаа за себе
Македонската алијанса за европска интеграција во Албанија не доби ни едно пратеничко место
Киро Кипроски
Не се остварија очекувањата на раководството на Македонската алијанса за европска интеграција дека во првото учество на парламентарни избори во Албанија, кои се одржаа во неделата, ќе освојат најмалку еден пратенички мандат или, пак, два-три.
Во областа Мала Преспа, каде што се типуваше за сигурен пратеник, поради поделеноста на Македонците и недоволниот одѕив на гласачите, нивната партија доби 450 гласа од излезените 2.100 лица. Најмногу гласови освои коалициониот партнер на Македонската алијанса, Демократската партија на Сали Бериша - 920, Социјалистичката партија на Еди Рама - 605 и Грчката партија за човекови права - 87 гласа.
Македонската партија ги мотивираше Македонците да излезат на гласање, со што се покажа дека македонско малцинство не живее само во областа на Мала Преспа, туку ги има на целата територија на Албанија, во областите на Голо Брдо, на Гора, во градовите Кукс, Тирана, Корча, Валона, Билиште и во други градови и нивните селски населби. Всушност, ова беше и пробен попис, што во натамошните анализи и активности ќе и' биде потребен на македонската партија.
Раководството на Македонската алијанса е задоволно од првото учество на парламентарните избори, без разлика што не беше освоен пратенички мандат. Според зборовите на првиот човек на партијата, Едмонд Темелко, битно е тоа што се потврдиле нивните тврдења дека Македонци живеат на целата територија на Албанија. По изборите, очекува во сите области каде што е концентрирано македонското малцинство да се подобрат условите за живеење, да добијат поголеми малцински права, да можат во основното и во средното образование да учат на мајчин македонски јазик, да се чувствуваат како Македонци...
Македонската алијанса на парламентарните избори настапи со мотото „Гласајте македонски, гласајте по нашки“. Зошто со вакво мото? Темелко ни објасни дека на предизборните средби и разговори со Македонците кои живеат во областите Гора, Голо Брдо, во градот Билишта и околината и во други места, почувствувале дека Македонците се' уште имаат страв да го изговорат зборот Македонец, а зборуваат на чист македонски јазик, некои и не го знаат албанскиот јазик. Некои се' уште мислат дека живеат во Енверова Албанија, а не во демократска!
Темелко вели дека кога им го поставил прашањето: кои сте вие, на кој јазик зборувате, одговорите биле исти: ние сме наши, зборуваме по нашки. Но, стравот бил поголем.
Македонците во Албанија се' уште го носат историскиот товар. Македонските интелектуалци во Албанија ни велат дека уште многу години треба да минат да се промени свеста на нашинците, да се ослободат од стравот и да ја разберат демократијата, дека секој може секаде и секогаш, без страв дека ќе биде суден и затворен, да размислува со своја глава и јавно да го кажува своето мислење, своето чувство.
Изборните резултати на Македонска алијанса ќе и' послужат да создадат база на податоци каде и во колкав број Македонци живеат во Албанија. И покрај тоа што не освоија ниту едно пратеничко место, ако Демократската партија на Сали Бериша формира влада, Македонска алијанса како коалиционен партнер ќе влезе во извршната власт на Албанија. |
