Повеќе држави заеднички во борба против сомалиските пирати

Предлог-резолуцијата до Советот за безбедност беше изготвена од Франција, САД и Панама

Советот за безбедност на ОН едногласно гласаше да им се дозволи на земјите да испратат воени бродови во територијалните води на Сомалија за да се справат со пиратите. Резолуцијата им овозможува на земјите кои имаат согласност од привремената влада на Сомалија да ги искористат сите средства за да ги задушат дејствувањата на пиратите во наредните шест месеци. Изминатата година 26 брода беа нападнати од пирати во тие води. Гласањето следуваше откако ОН започнаа одделни мировни преговори со фракциите инволвирани во конфликтот во Сомалија. Меѓутоа, исламската опозиција соопшти дека директни разговори нема да се одржат на состанокот во соседен Џибути се' додека владата постави рок за повлекување на војниците од Етиопија, кои ја поддржуваат владата.

Крајбрежните води на Сомалија се во близина на маршрутите на бродовите кои ги поврзуваат Црвено Море и Индиски Океан, а владата не е во можност да го одржува редот во сопственото крајбрежје. Како последица на тоа на крајбрежјето на Сомалија во должина од 2.880 км е присутно пиратството. Резолуцијата беше подготвена од Франција, САД и Панама.

Дописниците јавуваат дека Франција во почетокот сакала да го прошири предлогот за да се овозможи решавање на проблемот со пиратството во други области како што е западна Африка. Кина, Виетнам и Либија соопштија дека гласале за предлогот бидејќи се однесува само на Сомалија, и не влијае на суверенитетот на другите земји. Но дипломатски извори јавуваат дека активностите на Советот за безбедност се значајни бидејќи се користи силата на меѓународното право за да се овозможи морнариците да ги гонат пиратите и вооружените ограбувачи.

Во понеделникот претставници на Советот за безбедност се состанаа со претставници на владата и опозицијата на Сомалија во луксузен хотел на бреговите на Црвеното Море. Разговорите, кои се одржуваат во Џибути бидејќи во Сомалија е премногу опасно, се дел од планот на ОН да посредуваат за првите официјални директни преговори меѓу ривалите во Сомалија. Но, Абдирахман Абдишахур Варсаме, заменик претседател на Алијансата за повторно ослободување на Сомалија (АРС) рече дека нема да се согласи со директни преговори се додека не биде поставен рок за повлекување на етиопските војници од територијата на Сомалија. (Би-Би-Си)