Иванов охрабрен од Обама
Америка е запозната со целата суштина на проблемот околу името, таа бара заемно прифатливо решение и сака да се дојде до решение со кое и двете страни ќе бидат задоволени. Ова го изјави македонскиот претседател Ѓорге Иванов коментирајќи ја средбата што ја имаше со американскиот претседател Барак Обама во Њујорк. Охрабрувачката порака, како што вели Иванов, му ја кажал Обама во текот на нивната средба за време на ручекот приреден од Генералниот секретар на ОН, а му ја повтори и му ја потврдил на приемот што го организирал. „Навистина тоа што ми го кажа претс��дателот Обама беше многу охрабрувачки, но детали не можам да кажувам“, вели во интервју за Гласот на Америка, програма на македонски јазик, претседателот Иванов. Според македонскиот претседател, тоа ни дава надеж затоа што во целиот тек на спорот американската администрација секојпат била информирана за сите детали од целиот овој процес и можеби се најзапознати, многу повеќе од европските лидери, за финеси што се суштествени во вакво прашање.
Иванов, пак, за средбата со грчкиот премиер Јоргос Папандреу вели дека разговарале за суштински проблеми, за реториката меѓу две земји, која во последно време добила едно повисоко ниво што треба да се спушти и дека треба прашањата што се чувствителни за двете земји да се тргнат од таква дебата. „Ја посочив чувствителноста за нас на прашањето за Уставот, оти се отвори од нивна страна, дека можеби Македонија ќе треба да го менува Уставот“, изјави Иванов. Тој на Папандреу му ја укажал позицијата на нашиот Устав, кој е многу повеќе од Устав по Охридскиот договор. „Тој е консензус на еден етнички баланс и доколку се отвори тоа, повторно може да го подели општеството“, го информирал Иванов грчкиот премиер.
Македонскиот претседател во интервјуто кратко одговара дека Македонија нема алтернатива за членството во ЕУ и во НАТО и дека ние како земја од еден невралгичен регион пред десет години, кој влегува во една стабилност, мораме да бидеме дел од тој севкупен процес. „Затоа ја поддржуваме агендата на господинот Папандреу за 2014 и му велиме: Ајде, преминете на дело, тоа е Ваша иницијатива“, вели Иванов. (Н.Р.) |