Повеќе трошиме, а помалку се грееме

Македонија годишно троши од четири до пет пати повеќе топлинска енергија во однос на европски��е земји, свеста за енергетската ефикасност е се' уште многу ниска, а мал е бројот и на оние што навистина го разбираат нејзиното значење без да го мешаат со заштедата на енергија и со обновливите извори на енергија.

„Штедењето енергија не е енергетска ефикасност, туку нејзин производ. Енергетската ефикасност значи домаќинско користење на енергијата. Целта, всушност, е да се задоволат потребите со што помалку енергија“, нагласи Јордан Војнески, експерт за енергетска ефикасност на вчерашната прес- конференција во Стопанската комора.

Според него, објектите во земјава годишно за загревање трошат од 120 до 150 киловат-часови по квадратен метар, а во Европа од 35 до 50 киловат-часови. Грејната сезона, пак, кај нас трае 180 дена, а во Европа 270.

Војнески напомна дека од 2005 година наваму ниту една издадена градежна дозвола не е усогласена со законот во однос на енергетската ефикасност. „Македонија има законска регулатива за енергетска ефикасност, но таа не е усогласена со европската. Недостасува правилникот што треба да гарантира дека идните објекти, кои допрва ќе се градат, ќе бидат енергетски ефикасни. Во националната енергетска стратегија, пак, не е дефинирано нивото на дозволена потрошувачка на топлина“, рече Војнески и додаде дека властите што даваат дозвола за градба треба да знаат дали идните објекти ќе бидат енергетски ефикасни.

Енергетската ефикасност да се насочи кон постојните објекти, препорачуваат експертите. Според нив, реконструкцијата на фасадите, која покрај фарбање вклучува и топлинска изолација, е од 20 до 30 отсто поскапа, но придобивките потоа се многу поголеми. (МИА)