Претходен број

Донесен Буџетот за 2009 година

За опозицијата, Буџетот не е за сите граѓани и не е развоен, а ниту соодветствува на кризата

Александрија Стевковска

Собранието вчера го донесе Буџетот за 2009 година. Станува збор за најобемен буџет досега, чие усвојување се одвиваше според новиот собраниски Деловник и во три дена собраниска анемична расправа што ја карактеризираа претежно монолози и предлози од опозициските партии, кои беа отфрлувани од владејачката партија, чии пак пратеници речиси и не беа присутни на расправата. Вчерашниот ден на собраниското „тресење“ на највисокиот економски документ продолжи во истиот дух. Опозицијата обвини дека Буџетот не е за сите граѓани и не е развоен, а ниту соодветствува на кризата, чии последици ќе се почувствуваат идната година, и дека земјава е пред банкрот, додека пратениците од парламентарното мнозинство со сите сили го бранеа владиниот предлог и остануваат на ставот дека се работи за развоен буџет и дека тоа ќе биде одговорот на земјава на предизвиците од кризата. За Буџетот беа доставени 204 амандмани, од кои беа прифатени само 15, и тоа предложени од позицијата, а се однесуваат на обезбедување дополнителни средства за собранието, МАНУ и ДИК.

Пратеникот од СДСМ, Андреј Петров, оцени дека предложениот буџет е преамбициозен и несоодветно распределен, во најголем дел наменет за регулирање плати и социјални трансфери. Тој смета дека се непотребни двојно зголемените инвестиции во образованието за набавка на компјутери и опрема и оти тие се првенствено неопходни во основната инфраструктура на училиштата.

„За Буџетот, како исклучително важен документ, Владата треба да ги прифати основните забелешки и само така ќе можеме да поминеме побезболно во 2009 година“, смета Петров, посочувајќи оти претстои специфичен период за државата поради глобалната економска криза. За Горан Мисовски од НСДП, загрижувачка е приходната страна во структурата и не се остварливи планираните наплати на одредени давачки и полнењето на Буџетот поради последиците од економската криза. Мисовски забележа дека обемот на капиталните инвестиции е на исто ниво како и во 2008 година.

Пратениците од владејачката коалиција ги оценија како неиздржани обраќањата на опозицијата.

„Не е точно дека Македонија е пре�� колапс и оти системот ќе се распадне.

Точно е дека ќе има последици од кризата, но со мерките од Владата и натаму ќе се продолжи со редовно и правилно прибирање на приходите во Буџетот“, истакна Оливер Деркоски од ВМРО-ДПМНЕ.

Борис Стојменов од ВМРО-Македонска партија, анализирајќи го движењето на БДП во изминатите 15 години, рече дека е забележан мал раст во 1998 година, изразен и 1999 и 2000 година, пад поради кризата во 2001 година, по што следува стагнација од неколку години и раст во последните три години.

„Може да се види пораст во време на владеење на ВМРО-ДПМНЕ и тоа се објективни бројки“, смета Стојменов и посочи дека кај Буџетот има рапиден раст од 2005 година. Реплицирајќи, Марјанчо Николов од СДСМ рече дека политиката на Владата се базира на потрошувачка и оти со досегашните проекции воопшто не се става во кондиција реалниот сектор, што, пак, не носи нови инвестиции и намалување на невработеноста.

„Овој Буџет воопшто нема разбирање за тешката економска ситуација на граѓаните, за лошата состојба во однос на ликвидноста на фирмите, го интересира само Владата да ги собере своите приходи по што повеќе разни основи“, нагласи Јован Манасиевски од ЛДП. Според него, нема категорија, од работник до земјоделец, што со овој Буџет нема да биде повеќе оданочена.

„Сите категории се оданочуваат со поголеми ставки. На тој начин се прибираат енормно високи средства што е планирано да се потрошат на непродуктивни и многу дискутабилни начини“, рече Манасиевски.

По завршување на општиот претрес, имаше амандманската расправа по Предлог-буџетот за 2009 година, во кои беа отфрлени неколку амандмани со кои опозициската СДСМ предложи средствата од буџетот предвидени за непотребни реклами, како што рече Јани Макрадули, да се пренаменат за подигање на човечките ресурси во Собранието, за изградба и подобрување на условите во парламентот и за поголеми плати и надоместоци на вработените во законодавниот дом. Радмила Шекеринска обвини дека власта воопшто не ги разгледува нивните предлози за измени во Буџетот, преку вградување амандмани, туку автоматски ги отфрла, бидејќи доаѓаат од опозицијата, а потоа сите гласаат како што сака Владата.

Буџетот за наредната година е планиран да изнесува 164 милијарди и 215 милиони денари (2,7 милијарди евра). Приходите се проектирани на 153 милијарди и 215 милиони денари, а дефицитот е проектиран на 2,8 отсто во однос на планираниот БДП. Според проекциите на Владата, БДП ќе продолжи да бележи висока стапка на раст од 5,5 проценти.