Црвенковски и Груевски се сретнаа пред посетата на Нимиц
Не може да се говори за приближувања или за разлики пред да биде познат пакетот што го носи медијаторот
Димитар Чулев
Шефот на државата, Бранко Црвенковски, и премиерот Никола Груевски вчера доцна попладне имаа средба на која ги координираа своите позиции во пресрет на посетата на медијаторот Метју Нимиц во Скопје, а во врска со разговорите за разликите околу името меѓу Македонија и јужниот сосед што се водат со посредство на ОН.
Неофицијално, Нимиц во Скопје би требало да дојде в петок или најдоцна до петок, а грчки медиуми во веќе познатиот стил шпекулираат дека она што го носи Нимиц како наводен предлог - излезно решение е опцијата „Северна Македонија“. Весникот „То вима“ пишува дека се повикува на високи дипломатски извори во Грција и вели дека овој предлог е употреблив и прифатлив за Атина како единствено име за употреба.
Кругови блиски на државно-владиниот круг во Скопје вчера не сакаа да шпекулираат ниту, пак, да коментираат кој е ставот на Македонија околу ова. Од друга страна, прилично нејаснотии создава изјавата на премиерот Груевски, кој за агенцијата МИА деновиве изјави дека „нема да потпишеме документ со кој го решаваме проблемот со Грција околу името, без претходно решението да го одобрат граѓаните на референдум“. Тој став Груевски рече дека бил дел од програмата на партијата пред предвремените избори.
Добар познавач на македонско-грчките соседи и аналитичар кој сакаше да остане анонимен вели дека проблемот е во тоа „пред“ и „по“ евентуалното постигнување решение. Грците би сака��е да постигнат решение во преговорите со Македонија, но решението претходно да не биде ставено на референдумско изјаснување.
Инаку, познато е дека проблем не е само името туку грчкото инсистирање за изнаоѓање наводно заеднички прифатливо решение, кое опфаќа цела палета прашања, како што се националноста на народот овде, јазикот, културниот идентитет.
Во новинарски кругови во Скопје се' поприсутно е мислењето дека грчката страна со тврдиот став се' повеќе се навлекува на терен во кој реално не може да се разреши проблемот со името. Многу е јасно дека датумот за преговори е последната барикада (по Самитот на НАТО) на која Грција ја чека Македонија во обид да ја притисне.
Висок дипломат вчера ни изјави дека таквата грчка исклучивост може да доведе до непријатна ситуација: македонско-грчкиот спор да биде „замрзнат“ за подолгорочен период од кој најмалку корист ќе има Република Македонија. |
