Контролорите уморни - безбедноста под прашалник

Професијата бара целосна концентрација, посветеност и сериозност поради густината на сообраќајот

Контролорите на летање предупредуваат дека е доведена во прашање безбедноста на македонското небо, бидејќи се принудени да работат повеќе работни часа од дозволеното. Независниот синдикат на „Македонска навигација“ укажува дека постои опасност од настанување авионски несреќи поради замор кај контролорите на летање што извршуваат сложени работи за безбедно, редовно и експедитивно водење на воздушниот сообраќај. Контролорите, предупредуваат од Синдикатот, подолг временски период работат под притисок на директорите во контролата на летање, предизвикано со намерно непочитување и прекршување на работното време.

За ова пред неколку месеци бил информиран и Инспекторатот за труд, а оттаму било констатирано дека во периодот јули, август и септември во 2010 година контролорите работеле подолго од законски утврденото работно време. „Професијата бара целосна концентрација, посветеност и сериозност поради густината на сообраќајот, брзината на настаните и опасноста од безбедносни ризици што се поврзани со работата на контролорите на летање, велат од Синдикатот, каде што причините за состојбите во М-НАВ ги гледаат во нестручниот раководен кадар што се вработува по партиска линија.

Во „Македонска навигација“, пак, велат дека работното време на контролорите на летање било усогласено со Законот за воздухопловство, откако добиле решение од Државниот инспекторат за труд. Оттаму негираат дека поради работното време на контролорите на летање била загрозена безбедноста на македонското небо ниту, пак, дека има какви било казнени мерки предвидени од Државниот инспекторат за труд. (С.Н.)