„Мамас“, со амбиција за Менхетен

Македонскиот бренд „Мамас“ вчера го презентираше својот нов уникатен производ, домашниот ајвар на мама Марија. Станува збор за заеднички проект на компанијата „Македонија-експорт“, задолжена за креирање и развој на брендот, и „Тргопродукт“, кому му припадна обврската за оригиналниот и стандарден вкус на „Мамас“.

„Наша генерална цел е ’Мамас‘ да прерасне во светски познат бренд, гордост на секој Македонец, кој ќе биде прифатен и консумиран од нашите во странство, а ќе стане препознатлив и интересен и за странските купувачи“, изјави Петар Лазаров од „Македонија-експорт“, кој најави дека нивна замисла е „Мамас“ да се продава и на Менхетен. „Покрај приказната и изгледот, ’Мамас‘ се карактеризира и со препознатливиот вкус, кој, според досегашните реакции од дегустаторите, е најблизок до оригиналниот вкус на ајварот на нашите мајки“, изјави Бобан Заев, управител на „Тргопродукт“ од Струмица. (Ек.Р.)