Претходен број

Рамковски го смени уредникот на „Шпиц“ Героски

Сменет сум поради политички причини, вели Бранко Героски

Светлана Унковска



Главниот уредник на бесплатниот весник „Шпиц“, Бранко Героски, вчера беше сменет од функцијата и наедно доби отказ од сопственикот Велија Рамковски, поради, како што му било речено, политички причини. На негово место е поставен новинарот и уредник во весникот, Ивица Антевски.

Рамковски на вчерашната средба со Геровски отворено му рекол дека единствена причина за неговата смена се ставовите околу спорот со името и со владината надворешна политика кои биле дијаметрално спротивни со неговите и затоа веднаш треба да го напушти кормилото на весникот, а во рок од три месеци и од самиот весник.

„Како што е познато, јас ја критикувам политиката на премиерот Никола Груевски и се залагам за компромис со Грција и брз влез во НАТО и во ЕУ за да се спречи изолацијата на земјава. Тој рече дека моите позиции ги смета за екстремни и довчерашната одлична соработка меѓу мене и него беа заменети со некои други причини и јас едноставно морам да заминам“, изјави Героски за „Утрински весник“.

Неговиот впечаток е дека до смената доаѓа поради, како што вели, деликатната ситуација кога меѓународниот фактор, најверојатно за последен пат ќе се обиде да изврши притисок за да се реши спорот со името. Премиерот Груевски во празничното обраќање на 8 септември повика да нема разлики околу владиниот став за овој спор, но Героски претпоставува дека тој, како еден од оние кои имаат поинакво мислење, за кое вели дека воопшто не го смета како екстремно, морал да биде сменет.

„Јас сум свесен дека кога сопственикот и уредникот ќе застанат на спротивни позиции, уредникот е тој што треба да си замине и во принцип не му се лутам, иако, искрено сум изненаден, затоа што ова е првпат отворено да се каже дека причините се политички, што е еден феномен“, вели Героски.

Првиот сомнеж, како што вели, кај него се јавил кога во завчерашниот текст во весникот „Вечер“ повторно била извадена рибарската приказна, која ја смета за еден смешен инцидент, но покрај тоа во содржината било наведено и дека весникот правел загуби, што директно му укажало дека разговори биле водени на неколку нивоа.

Бранко Героски вели дека со Рамковски се договориле во наредниве три месеци колку што ќе остане во „Шпиц“ да продолжи со пишувањето на неговите колумни и се надева дека тој ќе опстои на овој договор.

Тој првпат ја започна соработката со Рамковски како уредник на „Неделно време“, кое излегуваше кратко време, а потоа и како уредник на првиот бесплатен дневен весник „Шпиц“. Кратко време беше и уредник и водител на истоимената емисија „Шпиц“, која се емитуваше на А1 телевизија.