Отворањето нов фронт на Блискиот Исток би било стресно за САД
Главниот воен офицер на САД смета дека нов фронт со напад врз Иран би било „екстремен стрес“
ВАШИНГТОН - Главниот воен офицер на САД изјави дека отворањето нов фронт на Блискиот Исток преку напад врз Иран би било „екстремен стрес“ за американските сили. Адмирал Мајк Мулен, началник на Генералштабот на здружените сили, ја коментираше веројатноста за американска или израелска воена акција поради нуклеарната програма на Иран. Напнатоста се зголемува поради информациите дека Израел можеби планира напад врз нуклеарните објекти на Иран. Иран негира дека неговата нуклеарна програма е наменета за друго, освен за мирољубиви цели.
Дописникот на Би-Би-Си од Вашингтон јави дека подолго време е јасно дека адмирал Мулен не сака напад врз Иран. Но, неговите најнови коментари сугерираат дека тој цврсто се бори зад сцената и САД и Израел внимателно да размислат за последиците од евентуален напад пред да се решат да го направат, рече тој.
На конференцијата за печатот на американското Министерство за одбрана адмирал Мулен одби да каже што го известиле израелските лидери на состаноците минатата недела во врска со какви било планови за напад врз Иран. Меѓутоа, тој предупреди дека отворање трет фронт, по Ирак и Авганистан, би било „екстремен стрес, многу предизвикувачки, со последици кои тешко би се предвиделе“. На прашањето дали е загрижен дека Израел би нападнал пред крајот на годината тој рече: „Ова е многу нестабилен дел од светот и не треба да биде уште понестабилен“.
Адмиралот изјави дека доколку започне конфликт тој е уверен дека Иран ќе биде способен да го прекине поморскиот сообраќај преку стратегиската Ормудска теснина, воден премин во близина на Заливот, но не наведе дали американската морнарица ги зајакнува патролите во регионот.
На американскиот претседател Џорџ Буш, претпоставен на адмирал Мулен, исто така му беа поставени прашања за неодамнешните шпекулации дека е можен воен напад врз Иран. Претседателот изјави дека сите опции се на масата, но дека воена акција не би била негов прв избор. Неговите високи претставници ќе бидат задоволни од таков одговор, јавува дописникот на Би-Би-Си од Вашингтон. (Би-Би-Си) |
