Струен удар усмрти брачна двојка
Струен удар усмрти брачна двојка во дојранското село Црничани. Трагедијата се случила во петокот, околу 20,45 часот, при наводнување на земјоделски култури во пластеници. Според полицијата, Јоже Д. (38) и неговата сопруга Даниела Д. (33), поради слабата видливост во пластениците, вклучиле сијалици инсталирани со обичен кабел што на едно место бил оштетен.
Кога Јоже се фатил за жицата бил погоден од струен удар. Сопругата се обидела да му помогне, но кога го допрела и таа добила струен удар. Двајцата починале на самото место, па лекарите од Медицинскиот центар во Гевгелија единствено можеле да констатираат смрт. Телата на починатите сопружници се дадени на обдукција. (Г.А.) |
