Насловна

Рестрикции

Без вода на плус 40

Ангел Данов

Тиквешани со часови остануваат без вода за пиење. Рестрикцијата и годинава стана секојдневје иако се ветуваше брзо решавање на проблемот со водоснабдувањето кога се покачи цената на водата за пиење. Наместо да се разладуваат, Тиквешани на плус 40 се принудени да полнат пластични шишиња и кофи. Во Кавадарци има дневна рестрикција од 12 до 14 часот и ноќна од 00 до 05 часот. Граѓаните велат дека рестрикцијата трае многу подолго од официјалните термини. И во Неготино се зголемија рестрикциите - од 8 часа дневно на 12 часа, а повисоките зони во градот немаат вода и по цел ден. Граѓаните ја бараат вината во локалната самоуправа и во „Комуналец“.

„Во Неготино има рестрикции на вода и во зимскиот период, а во лето, кога ни е најпотребна, за жал, ја немаме. Еве ова е водата што ја полниме за да можеме да одржуваме лична хигиена, а и за да ги извршуваме работите дома“, се жали Зорица Витанова од Неготино. Во иста насока се и коментарите на другите граѓани од Неготино и од Кавадарци. Сите негодуваат за покачувањето на цената. Велат, кога не' убедуваа да ја покачат цената на водата ни ветуваа и редовно водоснабдување, но нема ништо од тоа. „Сега сме принудени да се тушираме со шишиња. Притисок нема, не можеме да ги вклучиме ниту машините за перење“, коментираат граѓаните.

Од ЈП „Комуналец Кавадарци“ велат дека граѓаните ненаменски ја трошат водата за пиење. Некои дури наводнувале бавчи и лозови насади. За сите нив ќе има санкции. Граѓаните, пак, коментираат дека плаќаат вода и сакаат редовно да ја има во чешмите.

Од неготински „Комуналец“ потврдуваат дека има проблем со водоснабдувањето. Причините ги наоѓаат во зголемената потрошувачка на вода. Наместо досегашните 70 л/сек, кои што се обезбедуваат од регионалниот водовод „Лукар“, сега, како што велат оттаму, се трошат двојно повеќе. Комуналци смируваат дека проблемот ќе се надмине со искористување на кредитите што им се веќе одобрени за тоа.