Без најава, укинато зонското спроти „Рамстор“

Паркирањето кај трите кули по должината на „М.Х.Јасмин“ повторно е бесплатно иако до скоро чинеше 35 денари од час

Деспина Трајковска

На паркингот спроти „Рамстор“ кај трите кули на „Мито Хаџи Василев-Јасмин“ паркирањето веќе еден месец е бесплатно, иако до скоро таму се вршеше зонска наплата. Шеесетина места се комплетно слободни за бесплатно паркирање иако се' уште може да се види по некоја табла или обележан паркинг-простор кој наведува дека паркирањето се наплаќа по зонскиот систем. И поради неколкуте монтажи и демонтажи на информативните табли на ЈП „Градски паркинг“, станарите од околните згради и оние што често го користат паркингот се во недоумица што се случува со него. Дали одлуката за укинување на зонското паркирање е конечна, од кога е во сила и, воопшто, до кога ќе биде важечка.

Од ЈП „Градски паркинг“ само потврдуваат дека од изминатиот месец паркирањето во тој реон е бесплатно. Тврдат дека одлуката е донесена по барање на граѓаните во соработка со Општина Центар.

„Од Општината добивме наредба да ги отстраниме таблите, бидејќи станарите од околните згради не се согласувале да плаќаат, иако цените се симболични. Добиле поддршка од Општината и во случајов го испочитувавме барањето“, вели накусо Борче Јакимовски, директор на ЈП „Градски паркинг“.

Тој не сака да ги коментира, а у��те помалку да верува во шпекулациите дека, всушност, ова е игра на Општина Центар и нејзиното претпријатие за паркиралишта. Наводно, ЈП „Паркинзи на Општина Центар“ подготвува терен и да го земе под свое и овој паркинг со кој стопанисуваше „Градски паркинг“ како дел од пакетот намери за преземање на паркинзите кои се' уште се под градска капа. Имено, во непосредна близина на паркингот кај кулите, општинското ЈП има свој паркинг со рампа (зад „Трготекстил“), кој наводно планира да го прошири токму таму каде што до неодамна важеше зонското паркирање.

Од општинското претпријатие вчера не беа достапни за коментар, директорот не одговараше на телефонските повици.

Дел од станарите, пак, од кулите велат дека не знаат оти постоела иницијативата за укинување на зонското. „Сега сме во полоша ситуација. Така барем плаќавме повластени 200 денари и речиси секогаш имавме место за паркирање. Сега, кога за сите е бесплатно, ретко човек да најде место“, коментира една станарка, свесна дека поради недостиг од паркинзи во центарот на градот, но и заради потребите од растоварување на сообраќајот, неопходно е граѓаните да плаќаат за паркирање.