Претходен број

Работник тешко повреден по пад од скопскиот стадион

Градежен работник е тешко повреден по пад од скопскиот стадион, при изведба на градежни работи на северната трибина. Тој веднаш бил префрлен во Ургентниот центар во Скопје и се наоѓа во критична состојба.

Полицијата била известена за несреќата околу 12.30 часот, дека педесет и петгодишниот работник се повредил при изведувањето на завршните работи околу изградбата на северната трибина на скопскиот стадион „Филип Втори Македонски“.

Тој е хоспитализиран на Клиниката за неврохирургија во Скопје, од каде што информираат дека градежниот работник се здобил со повреди на главата и на стомакот. Лекарите стравуваа дека има повреди на слезината и внатрешно крвавење, така што вчера итно го оперираа.

Директорот на Ургентниот центар, Реџеп Селмани, за МИА изјави дека по тешкото паѓање работникот околу 9 часот бил пренесен прво во Воeната болница, а потоа оттаму на Клиниката за неврохирургија. „Работникот е во животна опасност. Неговата здравствена состојба е критична. Моментно е во коматозна состојба, а по направените снимки е констатирано внатрешно крвавење во пределот на главата“, вели Селмани.

Трудовите инспектори вчера излегле на терен да направат увид за причините за несреќата, но се' уште не се соопштуваат детали за тоа што утврдила инспекцијата.

„Наши инспектори излегоа на терен за да утврдат што се случило. Кои се причините за несреќата ќе се знае откако ќе се изготви записникот од направениот увид. Доколку има неправилности ќе се преземат определени мерки и санкции во согласност со законот“, велат од Државниот инспекторат за труд. (Х.Р.)