Поради болест, Панде Лазаров не дојде на судење
Поранешниот прв човек на „Електростопанство на Македонија“ Панде Лазаров (64) поради нарушена здравствена состојба не се појави на закажаниот почеток на судскиот процес против него за вчера. Тој е обвинет дека сторил кривични дела перење пари и други приноси со злоупотреба на службената положба и овластување.
Првото рочиште траеше само петнаесетина минути, а судијката Весна Димишкова во записник констатира дека одбраната на обвинетиот Лазаров доставила медицинска белешка од психијатриски центар, со која се потврдува неговата нарушена здравствена состојба и се препорачува лекување. Всушност, токму поради неприсуството на обвинетиот, судот донесе решение со кое судењето го презакажува за крајот на идниот месец.
Лазаров се товари дека заради остварување противправна имотна корист меѓу 1996 и 1998 година, од странски компании примил поголеми парични износи што му биле исплатени на сметки во странски банки.
Обвинетиот беше притворен кон крајот на мај оваа година, а кон средината на минатиот месец, откако беше понудена гаранција, тој беше пуштен да се брани од слобода. (Љ.С.) |
