Претходен број

Ден пред пресудата, градоначалникот делеше откази

Еден ден пред да му биде изречена тригодишната затворска казна, градоначалникот на Општина Аеродром, Кирил Тодоровски, потпишал три отказни решенија. Без образложение, градоначалникот одлучил отказ да му даде на синдикалниот водач во општината, на еден од чуварите и на вработен кој повремено ја вршеше функцијата возач на бившиот в.д. градоначалник Југослав Зиберовски.

Сите тројца, според вработени во општината, кои инсистираа да останат анонимни, не ги примиле решенијата, туку кога дознале за ненадејната одлука на Тодоровски веднаш заминале дома со намера во наредниот период да користат боледување.

Уште десетина вработени, по вчерашниот исход од судскиот процес против градоначалникот, заминале на боледување.

„Господ нека ни е напомош. Не можеме да претпоставиме што се' ќе се случува од понеделник, имајќи го предвид карактерот на градоначалникот. Не можеме да бидеме сигурни дека, и покрај се', работите во општината ќе се одвиваат нормално. Неговото однесување е непредвидливо и оправдани се стравувањата кај најголемиот број од вработените. Ќе помине долг период до правосилноста на одлуката, па веројатно тој ќе си го истера градоначалничкиот мандат докрај. Кога ќе ни текне дека откако го пуштија од притвор веднаш дојде во општина и тоа во сабота, па менуваше брави, не знаеме што може сега да не' снајде “, коментираа вчера вработени во општината.

Со градоначалникот Тодоровски вчера не успеавме да стапиме во контакт за да ни ги образложи причините поради кои ги поделил отказите. Сашо Петковски, претседател на Советот на Општина Аеродром, не сакаше да ги коментира вчерашните случувања. Единствено рече дека планира идната недела да свика вонредна седница на Советот. (Дс.Т.)