Претходен број

Македонски состојби

Али Ахмети нов војвода на ВМРО-ДПМНЕ!

Манчо Митевски

Тешко дека Собранието ќе биде "храм на демократијата", многу поизвесно е дека ќе биде "храм на партијата"

Се' што Груевски и ВМРО-ДПМНЕ не успеаја како закон да завршат во двегодишниот мандат (2006-2008), ќе го заврши, но "надградено и проширено", новиот спикер Вељановски и парламентарното мнозинството за само десетина дена, во периодот меѓу конституирањето на новиот состав на Собранието и формирањето на новата влада. Во новото владино мнозинство се чека уште ДУИ, па да започне идилата во македонскиот "храм на демократијата", како што кажа дека ќе го направи во иднина Собранието неговиот нов претседател. Знаејќи дека ВМРО-ДПМНЕ ќе инсистира на преродбата во 100 чекори, а ДУИ нема да попушти од мајскиот договор, се добива впечаток дека Собранието нема да биде "храм на демократијата", туку ќе се сведе на "храм на партијата"!

Ако се суди според стартот, тешко дека ќе го гледаме филмот за демократијата. Посебно што сега, со 63 места во парламентот, се' поизразена е самодовербата, но и арогантноста на владејачкото мнозинство кон ставовите и сугестиите на опозицијата и на експертската јавност во однос на повеќе законски проекти. Спикерот се пофали дека до формирањето на новата влада ќе ги донесе сите закони и измени што се доставени на неговата маса од техничката влада, некаде околу 80 на број. Тоа му успева, бидејќи сите овие закони се донесуваат по итна постапка, без комисии и слични законски процедури, а владејачкото мнозинство, потпомогнато од пратениците на ДУИ, речиси немаат време да ги спуштат рацете меѓу две гласања. Згора на тоа, се случи и преседанот, ист човек, Селмани, и да предлага закон како министер, и да гласа за него како пратеник! Опозицијата, експерти и граѓани се закануваат дека многу од инстант-законите ќе одат на преиспитување во Уставен суд, кој и онака има полни раце работа со многу оспорени законски решенија од минатите дваесет месеци на старата влада.

Од вчера во политичките кулоари почнаа да се вртат шпекулации дека по вонредните парламентарни и пред евентуалните вонредни локални избори, се подготвува вонреден конгрес на владејачката ВМРО-ДПМНЕ, и тоа повторно во Штип! На конгресот, според шпекулациите, ќе требало да се донесе одлука за разрешување на еден и именување нов војвода на ВМРО-ДПМНЕ, се разбира покрај Никола Груевски! Во новонастанатата ситуација на македонската политичка сцена и во владејачката коалиција се очекува да биде разрешен досегашниот војвода Мендух Тачи, а на неговото место да биде поставен Али Ахмети! Се очекува на конгресот да се донесе и одлука во Музејот на на ВМРО-ДПМНЕ да бидат изложени восочните фигури и на Мендух Тачи и на Али Ахмети, со тоа што, поради дневнополитичката конјунктура и опстојателства, Тачи да биде сместен во делот на негативните личности во историјата на партијата, а Ахмети во позитивните! "Терористите кои од планините директно влегоа во пратеничките фотелји", вокабулар кој од завршувањето на војната во 2001 година, па се' до неодамнешната кампања на вонредните парламентарни избори често го употребуваа лидерите и членството на ВМРО-ДПМНЕ, сега со волја на Груевски и амин на партијата, ќе влезат и во кабинетот на најмакедонската партија.

Мислам дека Груевски, иако под притисок на меѓународниот фактор кој по предизборните, изборните и постизборните инциденти никако не можеше да ја смисли ДПА повторно во Владата, направи добар потег со одлуката да коалицира со ДУИ. Прво, поради убедливата победа на изборите кај албанскиот електорат и покрај заплашувањата и крвавите инциденти. Второ, бидејќи станува збор за партија со голем коалициски капацитет и принципиелност со партнерите. Трето, поради големиот број компетентни кадри кои можат да се најдат во првите и во вторите ешалони во Владата.