Лукашенко доби нов мандат

За да спречи протести на незадоволство од изборите, Лукашенко стави огромна елка на плоштадот во Минск

МИНСК - Во Белорусија се одржаа претседателски избори, и според првите резултати сегашниот шеф на државата, Александар Лукашенко, победил со околу 70 отсто освоени гласа.

Ова се четврти едноподруго претседателски избори во Белорусија од стекнувањето независност од Советскиот Сојуз во 1991 година, а од тоа Лукашенко е на власт во последните 16 години. За да спречат можни протестни собири, властите го претворија плоштадот во огромно лизгалиште декорирано со божикна елка, најголема во градот. Опозицијата соопшти дека лизгалиштето нема да ги спречи да организираат собир, па дури и измислија слоган со кој се повикуваат поддржувачите да донесат ќеси со сол и песок на плоштадот за да се справат со мразот.

Кандидатите на опозицијата веќе ги прогласија изборите за лажирани и покрај тоа што им беше дадена поголема слобода да водат кампања и пристап до националната телевизија за секој кандидат - невидени мерки досега што се сметаат за обиди на Лукашенко да добие одобрување од Европа.

Државните медиуми ја обвинија опозицијата дека се обидува да организира „револуција во боја“, слична на масовните собири со кои беа соборени старите режими во Грузија и во Украина. Едно време обвинет од страна на САД дека ја предводи „последната диктатура“ во Европа, Лукашенко стана познат по глупостите како што е, на пример, како го облекува својот малолетен син, наводно, роден вонбрачно, во комплетна воена униформа за паради, но, исто така, и поради нетолеранцијата кон дисидентите. Американските дипломати го нарекуваа Лукашенко како „видно нездрав“ човек кој „има намера да остане на власт неограничено“ во телеграмата што ја објави „Викиликс“.

Само изборите со кои Лукашенко дојде на власт во 1994 од страна на набљудувачите беа оценети како фер. Негови главни противкандидати беа лидерот на движењето „Зборувај ја вистината“, Владимир Нјекљаев, поранешен заменик-министер за надворешни работи, Андреј Сањиков, и заменик-претседателот на Обединетата граѓанска партија, Јарослав Романчук. (АФП)