Средба Груевски - Берлускони

Премиерот Никола Груевски учествуваше вчера на самитот ЕУ - Африка во Триполи, во форматот лидер на земја-кандидат за влез во Унијата. На самитот учествува и грчкиот премиер Јоргос Папандреу, заедно со шефот на дипломатијата, Димитрис Друцас, но засега нема најава за средба со македонскиот премиер. Првите луѓе од 80 земји со над една и пол милијарда луѓе расправаа за имиграцијата од Африка и за помошта што може да ја даде Европската унија преку проекти вредни стотици милиони евра, пред се', во здравството, образованието, информатичката технологија, науката и слично. Гадафи им порачал на европските лидери дека ако не им дадат помош од 5 милијарди евра на африканските земји, тој нема да го попречи влезот на емигранти од Африка кај нив, па Европа ќе поцрни. На самитот, премиерот Груевски имаше средба со италијанскиот премиер Силвио Берлускони, на која се зборувало за трговската размена меѓу двете земји, за реформите во Македонија и за процесот на евроинтеграцијата. Груевски се сретна и со лидерите на Централноафриканската Република и на Танзанија.