Бучковски закачи слика од Груевски

Тамара Грнчароска

Непродуктивна дискусија, обвинувања кој е поголем, а кој помал патриот, кој го штити името, кој не, кој бил за независна Македонија во 1991 година и кој што правел во деведесеттите години, па дури и обвинувања на некои пратеници дека соработувале со „некакви служби“ можеа да се слушнат вчера од говорницата на македонското Собрание, на седницата посветена на новиот извештај на ЕК за земјава. За владејачката партија извештајот е позитивен и покажува дека земјава се движи напред, а за опозицијата е лош и покажува дека земјата стои во место. На прашањето - што по Извештајот и што со забелешките што тој ги содржи, никој конкретно не се осврна.

Радмила Шеќеринска-Јанковска од СДСМ ја обвини Владата дека нема план како да стигне до датум за старт на преговори со ЕУ. Според неа, власта се прави дека не го разбира дипломатскиот речник на Брисел, па низок, ограничен, слаб, релативен напредок ги чита само како напредок, што е далеку од реалноста. Таа го обвини Собранието дека е само архивар на она што како документи му стигаат од Владата и дека пратениците не ја сфаќаат сериозноста на ситуацијата. Притоа, го прозва премиерот Груевски со зборовите дека само дома покажува мускули, а надвор молчи и дозволува дури и неговата партија во европската десница да биде регистрирана под ПЈРМ. Како доказ за погрешната политика на Владата, која ги урива позициите на државата, таа го посочи извештајот од 2005 година каде што името Македонија се спомнува 36 пати! На тоа и' реплицираше Петар Поп-Арсов од ВМРО-ДПМНЕ, кој кажа дека ако некој го штити името, тоа е неговата партија. Според него, извештајот на ЕК е доказ за напредокот на земјата, обвинувајќи ја опозицијата за негова фетишизација со која се прави поделба.

Владо Бучковски од СДСМ, исто така, сметаше дека власта нема вистинска политика за евроинтегрирањето на земјава, па не е битно кој е на чело на СЕП, „дали Васко, Ивица, или утре Илија, бидејќи проблемот е во политиката“. Тој побара Груевски да биде присутен во Собранието кога се расправа за вакви прашања, па во негово отсуство на говорницата закачи фотографија од премиерот. Поп-Арсов му реплицираше на Бучковски дека Груевски е таму каде што е клучно за македонското евроинтегрирање, во моментот на самитот ЕУ - Африка во Либија, со забелешка „зар треба да биде тука и да ве слуша вас“.

Пратениците од владејачката партија ги прашуваа опозиционерите што направиле тие за евроинтегрирањето, кој го прифати ПЈРМ како име, кој делел флаери за останување во СФРЈ, а Анита Стефановска, на дискусијата на Тито Петковски, реплицираше со констатацијата „не сакам да говорам за вашата соработка со некои служби“. Петковски, поради ставот дека власта личното достоинство го става пред достоинството на Македонија и дека се потребни храбри потези за да се реши спорот, беше пречекан со коментар - дали доаѓа од грчкото собрание.