Вашингтон чека иницијатива од Македонија

„Исходот од Самитот на НАТО во Лисабон за Македонија беше очекуван. Се надевам дека нема да потрошите уште две и пол години за да се дојде до решение за спорот за името, кое е услов за добивање на поканата за членство во НАТО“, изјави вчера американскиот амбасадор Филип Рикер.

„Северноатлантскиот совет ги повтори позициите од Букурешт, а тоа е дека Македонија ги исполни критериумите и на земјата ќе е' биде дадена покана за членство штом ќе го реши прашањето за името со Грција“, рече Рикер. Напомена дека оттогаш поминаа две и пол години и оти се' уште нема решение за името.

„Разочарани сме што се' уште не е постигнато тоа. Како и да е, одговорноста е кај лидерите и кај народот на Македонија да се најде конечно решение. Да се надеваме оти тоа ќе го сфатат и оти нема да чекаат уште две и пол години во кои ќе се поставуваат истите прашања“, рече американскиот амбасадор.

Прашан дали се можни какви било иницијативи од страна на САД за надминување на спорот за името, Рикер посочи дека тоа треба да биде иницијатива на Македонија.

„Тие иницијативи се нешто на што вие треба да се фокусирате. Тоа е ваша иднина. САД сакаат да помогнат, но ние не можеме да сакаме повеќе од вас да станеме членка на НАТО и да одиме напред кон она што се ваши цели. Ова е нешто што се надеваме дека Македонија и Грција ќе го прифатат и ќе работат брзо на тоа. Како што кажав многупати порано, не правете ги работите покомплицирани од тоа што се. Фокусирајте се на прашањето за кое веруваме дека е предмет на разговор и како да се реши тоа. Работете на реформите и работете заедно со Грција за да дојдете до решение што е можно поскоро“, порача Рикер.

Американскиот амбасадор не сакаше да ги коментира случувањата во врска со бришењето на македонскиот јазик од регистарот на ОН, ниту најавите за можни предвремени избори во Македонија. (МИА)