Поглед

Приватни лопати

Деспина Трајковска

Владините функционери почнаа да фрлаат лопати и на приватни журови. Цела свита викендов се нафрли на камен-темелникот на приватна инвестиција за 14 згради во скопски Аеродром. И ништо немаше да биде невообичаено доколку објектите ги гради државата.

Место настанот да си го официјализира само во кругот на семејството, приватникот ги покани или можеби по своја волја му се придружија еден министер, тројца градоначалници, владини функционери од пониските ешалони... Всушност, тие беа во првите борбени редови. Министерот Јанакиески се фати за лопатата небаре неговото Министерство ќе ги гради и продава становите по поволни услови. Покуси не останаа ни градоначалниците, на Скопје Коце Трајановски, домаќинот Ивица Коневски, па дури и колегата од Ѓорче Петров, Сокол Митровски.

Која им е целта на функционерите да се појавуваат на вакви приватни журови, очигледно, само тие си знаат. Оти, апсолутно не држи вода изговорот дека станувало збор за голема инвестиција. Приватни бизниси се отвораат речиси секојдневно и тоа во секоја општина, но досега на таквите камен-темелници ретко имало функционери.

Се отвора дилема дали можеби станува збор за нова тактика на владејачката гарнитура за собирање симпатии кај граѓаните или, пак, во недостиг од свои нови проекти на ваков начин се исполнува лопатарската норма. Издржани се и размислувањата дека можеби функционерите им се додворуваат на приватниците. Во секој случај, ни министерот ни општинските татковци нема да останат без работа, оти само во Аеродром наскоро треба да се фрлат десетина приватни лопати. Најголема „тепачка“ ќе има за лопатата на скопскиот Менхетен, проект тежок дури 200 милиона евра.