Дваесет години затвор за убиството во „Амнезија“
КУМАНОВО – Дваесет години затвор за 27-годишниот Бранислав Ангеловски поради убиството во кумановската дискотека „Амнезија“, кое се случи на 14 јануари годинава. Ваква пресуда донесе вчера Основниот суд во Куманово, кој на тројцата соучесници во убиството на 26-годишниот Горан Петковски им изрече условни казни.
Казна за помагање во извршување на делото од една година условно доби Александар Ѓорѓиевски, додека Слаѓан Симоновски е осуден на една година и четири месеци затвор за учество во тепачка и спречување службено лице во извршување на должноста. Малолетникот што учествувал во инцидентот ќе биде под засилен надзор од службите на Центарот за социјални работи.
Во образложението на судската пресуда стои дека првообвинетиот Бранислав го лишил од живот Горан Петковски (26) на 14 јануари годинава во кафулето ,,Амнезија‘‘ во Куманово со четири истрели од пиштол и ранил еден полицаец, припадник на единицата ,,Алфи‘‘. На убиството му претходела расправија во кафе-барот што подоцна се претворила во општа тепачка. Настраданиот Горан, како обезбедувач на кафулето, по телефон побарал интервенција на полициските ,,алфи‘‘, кои веднаш пристигнале на местото на инцидентот. Во текот на расчистувањето на тепачката, некој од групата му нанел повреди по главата со стаклено шише на обезбедувачот на кафулето, а потоа првообвинетиот Бранислав извадил пиштол и со четири истрели го лишил од живот. До правосилноста на решението, првообвинетиот Бранислав Ангеловски ќе остане во притвор. (Ст.Б.) |
