Апелација ги потврди пресудите за Бродец
Апелациониот суд во Скопје ја потврди првостепената пресуда за 17-темина обвинети за тероризам што беа уапсени лани во ноември во акцијата „Планинска бура“ во тетовското село Бродец. Според неофицијални информации од судот, одлуката веќе е преведена, но се' уште не е препратена до Основниот суд Скопје 1, кој ја донесе пресудата. Во средината на јули годинава, Основниот суд донесе одлука со која на уапсените во Бродец им се одредуваат казни од речиси 200 години затвор. Максималните казни од по 15 години затвор ги добија водачите Лирим Јакупи -Нацист (29) од Бујановац, Фатос Алијај - Тоси (31) од Шенгин, Албанија, Амир Сопа (30) - командант Голема Дреница од Дреница, Косово и скопјанецот Метин Ислами (27) со прекар Талибани.
Хебиб Амети (27) беше осуден на 12 години, со напомена дека против него во тек е уште една кривична постапка за кривично дело убиство. Останатите дванаесетмина обвинети, главно жители на истото село, добија десетгодишни затворски казни. Групата беше осудена поради членување во терористичката група, но и за поседување тешко вооружување. (Х.Р.) |
