Царината ги презеде граничните премини
На граничниот премин Табановце завчера се изврши официјално примопредавање на надлежноста во однос на стопанисувањето со граничните премини од Јавното претпријатие за стопанисување со станбен и деловен простор на Царинската управа.
„Царинската управа, покрај тоа што ќе се грижи за објектите, ќе се грижи и за поквалитетно извршување на услугите на лицата што ја минуваат границата“, рече директорот на Царината, Ванчо Каргов.
Според него, по донесувањето на правилникот за висината на надоместоците, укинати се неколку надоместоци, како што се вагање на возилата и користење на паркинг-просторот. Се воведува само еден надоместок во износ од илјада денари за влегување на граничните терминали.
„Со примопредавањето започнува и трансформирањето на ЈП кое ќе треба да заврши до крајот на годината, а Царинската управа ќе продолжи со обнова на граничните премини“, рече директорот на ЈПССДП, Ивица Конески.
Царинската управа, како што беше најавено, ќе подготви стратегија за развојот на граничните премини, што во преден план ќе ја има модернизацијата на граничните премини. (МИА) |
