Клинички стоматолози во улога на приватни лекари

Јасмина Јовановска


Стоматолози вработени во државното здравство ќе бидат плаќани како приватни заболекари. Пред околу еден месец, Стоматолошкиот клинички центар склучил договор со Фондот за здравствено осигурување со кој и специјалистите ќе може да бидат плаќани како матични стоматолози за услуги од примарната стоматологија. За Стоматолошката комора, која вчера реагираше, ваквиот договор е незаконски.

„Наставниците од Стоматолошкиот факултет не може да бидат и матични стоматолози, кои ќе бидат плаќани по капитација како и стоматолозите концесионери“, смета претседателот на Здружението на приватните стоматолози, Слободан Милутиновиќ. Според него, Стоматолошкиот Клинички центар е регистриран да врши само наставна и научна дејност, а не и класична примарна стоматологија. „Со договорот не само што се деградираат професорите и специјалистите што ќе мора да вршат обични забарски услуги туку како тие ќе постигнат и да ги поправаат забите на пациентите и да ги едуцираат студентите и специјализантите“, прашува Милутиновиќ и додава како може стручниот кадар да биде заложник за да може да се подели плата на техничкиот кадар, чистачките, обезбедувањето. На овој начин, Милутиновиќ вели дека им се задава директен удар на матичните стоматолози концесионери, а пациентите ќе бидат принудени да изберат нов матичен стоматолог.

Од ФЗО тврдат дека договорот е законски и е согласно со измената од Законот за здравствена заштита, направена во јуни годинава.

„Пред четири месеци беше направена измена во Законот за здравствена заштита, со кој на Стоматолошкиот клинички центар му се даде право да врши примарна стоматологија во функција на образовниот процес и карактерот на дејноста“, објаснува д-р Адријан Даци, директор на Стоматолошкиот клинички центар. Но, со новиот начин на плаќање нема да бидат опфатени наставници, тврди Даци, туку само клиничките лекари од три клиники кои не се дел од образованието. „Тие нема да бидат концесионери, туку ќе добиваат плата според систематизацијата, само што Фондот ќе ги плаќа извршените примарни услуги кај нив, како и упатувањето на пациентите на повисоко ниво на лекување“, објаснува д-р Даци, кој призна дека ова е направено за да може да се подобри финансиската состојба на Стоматолошкиот клинички центар, кој подолго време се соочува со проблемот да нема пари за исплата на плати.