Трагедијата го одложи „Тиквешки гроздобер“

КАВАДАРЦИ - Бродската несреќа во Охридското Езеро ги одложи сите програмски активности од туристичката и културната манифестација „Тиквешки гроздобер“, предвидени за вчера. И кавадарчани сочувствуваат со семејствата на загинатите во трагедијата. Организаторот на манифестацијата постапи во согласност со владината одлука, вчерашниот ден да биде ден на жалост во цела земја.

Винскиот карневал и сите други содржини се предвидени за денеска, во претходно закажаните термини. Кавадарци одбележува 65 години од ослободувањето. Вечерва ќе се одржи свечена седница на која ќе се додели наградата „7 Септември“ на приватното претпријатие „Кожувчанка“, над-р Ристе Шкрековски и НВО „Зона“.

Вчера во Кавадарци пред илјадници граѓани само продефилираа околу 500 мотоциклисти во рамките на релито „Независна Македонија“.

Винскиот боемски фестивал на кој се презентираа и се дегустираа вината на тиквешките винарски визби беше отворен во петокот. Концерт одржа група „Паркети“. Кавадарските кафулиња во знак на гроздоберскиот празник служеа вино и ракија по набавни цени. Во дискотеката К7 на градскиот базен беа избрани крал и кралица на гроздоберот.

Во саботата најмладите имаа можност да ги претстават своите желби и фантазии во рамките на детскиот гроздоберски карневал, кој го следеа неколку илјади граѓани. (А.Д.)