Претходен број

Државата на суд во Стразбур ако не изгради теќе на скопскиот плоштад

Во Владата немаат сознанија за барањето ниту, пак, сакаат да ги коментираат заканите за тужба

Деспина Трајковска

Дервишите од Македонија ќе ја тужат државата во Стразбур доколку не им изгради Вардали баба-теќе на скопскиот плоштад. Од верската заедница Светиот стол на суфиските еренлери на светот во Македонија сметаат дека целата постапка треба да се спроведе со одлука на премиерот Никола Груевски, како во случајот со изградбата на црквата „Свети Константин и Елена“.

„Не може државата за едни да биде мајка, за други маќеа, а третите да се копилиња. Ако може МПЦ да гради црква на плоштадот и тоа со државни пари, да и' се ветува на ИВЗ локација за џамија, нормално е и ние да го бараме она што ни следува. Доколку властите и во овој случај не' игнорираат, дефинитивно ќе докажат дека вршат дискриминација на верските заедници, што е спротивно на декларирањата оти сме демократска земја“, вели Сербез Фазли, поглавар на Заедницата, која неодамна до Општина Центар достави барање за измена на ДУП на плоштадот за да се овозможи изградба на теќе во зеленилото спроти „Тренд“, наместо сега предвидениот хотел и административно-деловен објект. За барањето писмено бил информиран и премиерот Груевски, кој, како што тврди Фазли, се' уште на Заедницата не и' доставил никаков одговор.

Владиниот портпарол Мартин Мартиновски вчера немаше сознанија за барањето на дервишите, ниту, пак, сакаше да ги коментира заканите за тужба на државните власти во Стразбур доколку не изградат теќе на плоштадот „Македонија“ во Скопје. „Урбанистичкото уредување е во ингеренции на Општина Центар, а не на Владата“, кусо дополни Мартиновски.

Градоначалникот на Центар, Владимир Тодоровиќ, завчера, пак, информираше дека допрва ќе го разгледа барањето и ќе донесе одлука дали врз основа на него ќе предложи измени на постојниот Детален урбанистички план. Со важечкиот ДУП во зеленилото спроти „Тренд“ сега има маркичка за изградба на хотел и на административно-деловен објект, а земјиштето е во приватна сопственост. Дали ќе се овозможи изградба на теќе на посочената локација, сепак, ќе зависи од конечната одлука на општинскиот Совет.