Претходен број

Јавноста информирана, но не и упатена во евроинтеграциите

„Јавноста се информира, но не и' се пласираат доволно анализи преку кои би изградила јасна слика и сопствен став за евроинтеграциите на Македонија, но и функционирањето на самата ЕУ“, е заклучокот на мониторингот спроведен врз известувањето на медиумите за извештајот на ЕК за Македонија, за кој вчера се одржа дебата на која присуствуваа претставници на дел од македонските медиуми.

Од анализираните седум дневни весници и седум телевизии со национална концесија, заклучокот во извештајот на НВО Инфоцентар е дека информирањето на медиумите се сведува на пренесување политички изјави и по некој експерт. Забуна, според набљудувањето, внесуваат и грешките и понекогаш елементарното непознавање или мешање на реперите од страна на новинарите во однос на ЕУ.

Во периодот пред извештајот и по него, во медиумите се објавени 197 новинарски прилози во контекст на ЕУ од вкупно 70 новинари. Од печатените медиуми, најголем број текстови - 28 за ЕУ објавил „Утрински весник“, додека од електронските медиуми најмногу прилози - 19 имал Канал 5. На дното на листата се весникот „Вечер“ со десет текста и телевизиите Сител и Телма со по девет прилози. Сепак, според изготвувачот на набљудувањето, најголем дел од новинарските текстови, дури 66 проценти, отпаѓаат на класични извештаи, а само 0,5 проценти на анализа, или изразено со бројка, само една анализа.

Според НВО Инфоцентар, за подобрување на состојбата и запознавање на јавноста со ЕУ и евроинтеграциите, потребна е обука на новинарите во таа област, соодветна поддршка од медиумите за тоа, подобар пристап до информации од институциите, но и поголема општествена дебата за евроинтеграциите и нивната суштина. (Т.Г.)