Италијанскиот амбасадор прогласен за почесен доктор на ДУТ
Лидерите на ДУИ и на ДПА, Ахмети и Тачи, седеа во првиот ред
ТЕТОВО - Амбасадорот на Италија, Силвано Петрола, прогласен е за почесен доктор на науки на Државниот универзитет во Тетово. Ова се случи на свечената академија на ДУТ што се одржа по повод 14 години од основањето.
„Универзитетот е законски признат пред четири години, а во својата работа има забележано големи резултати. Годинава постигна целосна консолидација и од законска гледна точка и во подигање на квалитетот на наставно-научниот процес. За сите професори и специјалисти вратите на ДУТ постојано се отворени“, рече во своето обраќање ректорот Сади Беџети.
Тој нагласи дека во рамките на ДУТ се акредитирани 11 факултети, а од оваа академска година со 300 студенти се почнати студии од вториот циклус. Сади Беџети вети дека ДУТ ќе се залага за создавање нови вредносни системи во образованието и науката, кои претставуваат перспектива за новите генерации. Лидерите на ДУИ, Али Ахмети, и на ДПА, Мендух Тачи, беа во првиот ред во големата сала на Домот на културата „Иљо Антески-Смок“. Впечатливо беше што нивното влегување беше во различно време и од различни страни. Изостана нивниот меѓусебен поздрав, а нивните седишта беа „раздвоени“ со други тројца гости. Во редоследот на поздравувањето, Сади Беџети првин го претстави лидерот на ДПА, а потоа на ДУИ. |
