Насловна

Кому му пречат демонстрантите?

Прво им ги гасеа светлата, потоа дека прават ѓубре кај Majка Тереза, а сега им велат - тука да не се собираат

Бојан Шашевски



На демонстрантите вчера не им беше дозволено да седнат на своето збирно место зад спомен-куќата на Мајка Тереза каде што се водат конструктивни граѓански дебати и се даваат понатамошни насоки за протестите. Тие, как�� и претходните дванаесет дена од мирните протести против убиството на Мартин Нешковски и полициската бруталност, повторно се собраа, но се појавија неколку лица што на дел од демонстрантите им порачаа дека, по налог на Министерството за култура, не можат да седнат на сцената. И на авторов на текстов му забранија да го постави велосипедот до локацијата наменета за трибини. Не сакајќи да влегуваат во расправии, протестантите мирно се тргнаа пред Домот на Арм и започнаа дискусија за новите активности.

Дел од присутните сметаат дека станува збор за уште една обична провокација за протестите, а други, пак, рекоа дека ова е јавен простор и воопшто нема основа за вакви забрани.

„Немаме добиено никаква официјална забрана да се собираме на ова место. На дел од луѓето им беше речено дека Министерството за култура наредило да не се седи на сцената поради ѓубрето што сме го правеле. Секој ден останувам до крајот на јавните дискусии и тврдам дека јас лично чистам и никогаш досега не сме оставиле смет зад себе“, рече Даут Бислими, еден од младите протестанти.

Неколкумина од демонстрантите велат дека, откако им биле гасени светлата за време на нивните ноќни дебати, сега некој се обидува со друга алтернатива за да ги избрка од локацијата.

Вработените и обезбедувањето во спомен-куќата на Мајка Тереза не сакаа да дадат конкретна изјава околу забраната за седење на сцената што е изградена заедно со објектот. „Доколку така рекле од Министерството за култура, тогаш обратете се таму“, рече еден од вработените.

Од Министерството за култура, пак, се оградуваат од каков било налог и инволвираност од нивна страна.

„Тоа е комплетна дезинформација. Ние немаме никакви ингеренции да забраниме такво нешто, односно не можеме да забрануваме пристап во урбанистичкиот дел од градот. Спомен-куќата на Мајка Тереза е посебна национална установа што си има своја управа и вработени што се грижат за тамошните активности и безбедноста на објектот“, одговори портпаролката на Министерството за култура, Анета Јовановска.

Протестите продолжуваат и натаму. Младите во петокот решија да го искористат пладневното собирање и да испечатат флаери за масовниот неделен протест што ќе започне во 12 часот, но и дополнителни копии од претставката со своите барања. Младите шетаа и им делеа летоци на слободните минувачи на улицата „Македонија“, просторот околу поранешен „Рекорд“, плоштадот, но и низ Старата скопска чаршија. Флаерите, на кои стоеше „Потребна ни е ваша подршка!“ и „Заедно сме посилни!“ беа испишани и на македонски и на албански јазик.