Адеми: Досиејата ги печатат поранешни функционери на ДБК

Вицепремиерот задолжен за спроведување на Рамковниот договор, Абдулаќим Адеми, вчера ги лоцираше главните актери во случајот со досиејата на функционерите на ДУИ. Тој е уверен дека „лажните досиеја се креација на членови на Демократската партија на Албанците, поранешни соработници на УДБА, функционери на ДБК што биле на позиција во 2001 година“.

„Сметам дека тие заедно не можат да се помират со фактот дека беа поразени во 2001 година и токму затоа произведуваат вакви фалсификувани документи“, изјави Адеми, кој вчера имаше средба со албанските историчари. На раководството на ДПА му порача да не се занимава со ниски работи, туку да понудат алтернатива на политиката на ДУИ и со неа да се борат за избирачите. „Треба да понудат опција, програма како политичка партија. Не треба да се кријат по подруми и да произведуваат фалсификувани документи со цел да дискредитираат политички опоненти“, рече Адеми.

Историчарот Музафер Беслими смета дека лустрацијата треба да им се препушти на институциите. „Македонија уште во 1990 година требаше да донесе закон со кој на сите што биле на функции во комунистичкиот режим ќе им се забранеше да се занимаваат со политика, односно да извршуваат политички функции од висок карактер. Со тоа ќе беше завршена целата лустрација“, смета Беслими. (П.Р.)