Писмото на Груевски го чека Баросо
Поради белгискиот национален празник, Комисијата се' уште нема коментар за пишувањата на премиерот
Брисел - Писмото на премиерот Никола Груевски до претседателот на Европската комисија, Жозе Мануел Баросо, го чека завршувањето на националниот празник на Белгија и, според најавите од дежурниот портпарол Џон Кленси, евентуално ќе биде прокоментирано денес. Писмото до Баросо се најде и на масата на еврокомесарот Оли Рен, но знаејќи ја практиката на ЕК да не се зафаќа со вакви спорови, тоа веројатно ќе биде уште еден доказ за Брисел дека спорот за името треба да се реши што поскоро.
Содржината на писмото, односно негирањето на правата на македонското малцинство не е непозната работа за земјите-членки на Унијата и за Европската комисија, која одамна има изготвено студија за состојбата на овој план во Грција, која ПОВЕЌЕ ОД една деценија фаќа праВ во Брисел. Декларативно ЕУ е целосно определена за почитување на човековите права, ставајќи ги во тој контекст, но во сенка, и правата на малцинствата. Приемот на Бугарија и фактот дека тоа не влијаеше на подобрување на состојбата со македонското малцинство таму, ниту пак се слушна за таков проблем во ЕУ, е најдобар пример што треба да очекува Груевски од Баросо, кој се обидува да турка агенда за наредниот век на Унијата, а Македонија со вакви теми го враќа во минатото. Европската комисија повеќе од два месеца не може да најде решение и за сосема легитимната реакција на Македонија околу забранетите прелети на МАТ на грчка територија, па Баросо веројатно е погрешната адреса за нашата „крстоносна војна“ со Грција, во време кога му е потребна грчката поддршка да остане и натаму на позицијата на која е сега.
Декларативно, ЕУ ги регулира правата на малцинствата во Повелбата за фундаментални права во која стои дека „се повикува за заштита на културната, религозна и јазична различност и се поддржува принципот на целосно уживање на правата и слободите без дискриминација, вклучувајќи го и припаѓањето на национално малцинство“. Исто така, во член 13 од основниот документ на ЕУ се овозможува на ЕК да преземе соодветни акции за да се справи со корупцијата, меѓу другото и на етничка основа.
Минатата 2007 година сите земји-членки требаше да формираат национални тела кои требаше да развијат национални стратегии како да се справат со дискриминацијата на разни основи, па и на етничката, но досега целата активност се сведе на спречување на социјалната и економската дискриминација, без да се спомнат и со една буква политичките права на малцинствата во земјите-членки. Пред големиот бран на проширување на ЕУ десетте источноевропски и други земји-членки мораа да ги решат прашањата околу правата на малцинствата пред да ги потпишат протоколите за приклучување, и тоа го направија по барање, но не и интервенција и мешање на ЕУ. (С.Ј.) |
