Претходен број

Градот го чисти коритото на Вардар веќе шест месеци

По недоразбирањата помеѓу Владата и градоначалникот на Скопје Трифун Костовски, околу чистењето на речното корито на Вардар, Градот вчера со писмен допис ја информираше јавноста за чекорите што ги презел за одржување на реката. Како што се вели во дописот, акцијата за одржувањето на минор-коритото започнала пред половина година и се одвивала во три фази. Коритото се чистело рачно и машински, за што од градскиот буџет биле издвоени 11,8 милиони денари, а изведувач било ЈП „Улици и патишта“. Во акцијата рачно се исчистиле косините, каналот на реката кај Крушопек, коритото на Водњански канал, а било извршено и машинско чистење на песочни наноси и тиња. Според договорот помеѓу Градот и претпријатието, од април годинава минор-коритото во урбаниот дел на Скопје се одржува, исто така, со средства до градскиот буџет.

„Одржување е планирано и за 2009 година, на површина од 85.000 квадратни метри. Планирано е да се почне и со фугирање на камената облога со цемент малтер на површина од 8.000 квадрати на локација спротиводно од зградата на Владата и низводно од булевар ‘Кочо Рацин‘“, посочуваат од Градот. (Дс.Т.)