Ако сакаме во ЕУ, цената на струјата мора да расте

Цената на електричната енергија треба да се усогласи со пазарот од кој сме и ќе бидеме дел, а тоа се Југоисточна Европа и Европската унија. Тоа подразбира раст на цените, обелодени вчера министерот за економија, Фатмир Бесими, за време на расправата за предлог-законот за енергетика, за кој Собранието даде зелено светло за натамошно разгледување.

„Доколку таму цените се повисоки, и кај нас цените ќе бидат повисоки. Либерализацијата на пазарот треба да донесе цени што ќе гарантираат успешен бизнис во енергетиката во земјава“, изјави Бесими, а, според него, во таква ситуација треба да се зајакне улогата на регулаторот.

Според него, овој закон не се носи за една или за друга компанија, без разлика што претходно имало коментари во однос на тоа дека од еден монопол се трансферираме во друг монопол.

„Енергетската заедница за овој закон кажа дека ги постигнува целите за кои беше наменет. Сметаме дека тие предлози гарантираат поквалитетни решенија“, рече тој.

Јани Макрадули од СДСМ најави дека неговата пратеничка група ќе поднесе амандман за скратување на сите рокови за носење прописи од страна на Регулаторната комисија за енергетика и рече дека, доколку се либерализира пазарот на енергија, снабдувачите со електрична енергија по 2015 година треба да се изберат на тендер.

Координаторката Цветанка Иванова најави дека оваа пратеничката група на СДСМ ќе го поддржи предлог-законот, но оти во втората фаза очекува бришење на член 61 од предлогот, со кој, како што рече, се врши упад во надлежностите на локалната самоуправа, бидејќи во него се предвидува дозвола за изградба на нови системи за дистрибуција на електрична енергија, за пренос на природен гас и на нови објекти за транспорт на сурова нафта и нафтени деривати да дава министерот. Иванова праша дали ова значи можност за стопирање на проектот за гасификација на општина Струмица. (МИА)