Ни ОХИС не сака никој да го купи

Тендерска документација не подигнала ниту една компанија, истото тоа се случи и со другите загубари

Маја Томиќ

Досега нема заинтересирани фирми за купување на ОХИС, велат од Министерството за економија, а многу веројатно дека и во наредните неколку денови нема да има конкретна понуда од инвеститор. Овој загубар по петти пат се нуди на продажба, исто како и другите загубари, а рокот на последниот јавен повик завршува на 2 ноември. Досега тендерска документација не подигнала ниту домашна ниту странска фирма. Од Економија велат дека официјален коментар ќе имаат кога ќе заврши рокот на 2 ноември.

По неуспешната продажбата на останатите загубари, Владата веќе изрази песимизам и за ОХИС. Деновиве вицепремиерот Владимир Пешевски изјави дека, најверојатно, и овој тендер за ОХИС ќе заврши без успех, а потоа и за оваа фирма ќе се смислуваат поинакви тендерски услови, што следи и за другите загубари.

Владата летово го иззеде ОХИС од пакетот на прилепските „Еурокомпозит„ и „Тутунски комбинат“ и охридски ЕМО. Одлучи фабриката да ја продава како посебна целина поради проблемот со државната сопственост на земјиштето на кое е лоциран објектот. Дали можеби и превисоките критериуми поставени во јавниот повик ги одвратија потенцијалните инвеститори ? И за ОХИС важеше правилото како за другите загубари, идниот инвеститор да ги задржи на работа сите вработени во наредните 5 години, што според Пешевски, беше најголемата бариера за инвеститорите. Следното на што беше обврзан во наредните пет години е банкарска гаранција од два милиона евра, додека за учество во тендерот се бараше гаранција од 35.000 евра. Стратегискиот инвеститор, правното лице, требаше да има остварено и годишен приход во изминатите две години од по 20 милиони евра, додека ако стануваше збор за финансиски инвеститор, неговиот годишен приход требаше да изнесува 50 милиони евра.

Инаку, ОХИС се продава со обврски од 2009 година во висина од 16,9 милиони евра, со остварена загуба од 6,37 милиони евра и со 877 вработени. Овој загубар само за шест месеци од годинава акумулира загуба од плус еден милион евра.

Моделот и критериумите за последниот тендер за загубарите, како што е веќе познато, беа изработени од консултантите „Дилоит и Туш“ и „Бул брокерс“, како гаранција дека тој ќе биде така скроен што ќе привлече инвеститори. За таа цел, од државната каса беа искеширани 700 илјади евра. Сега по неуспехот, Владата најави дека ќе подготви поинакви критериуми, а, најверојатно, ќе се оди на варијантата продажба преку директни преговори со потенцијални купувачи или со наддавање или, што би се рекло, очи в очи.