Нема ревизија за куќите до 200 квадрати

Се укинува задолжителната ревизија на основниот проект за објекти наменети за индивидуално домување со површина до 200 квадратни метри, како и задолжителниот надзор на самата изградба. Ваквите објекти ќе бидат ставени во употреба само со изјава од изведувачот заверена на нотар.

Ова е една од најновите измени на Законот за градење со кои вчера министерот за транспорт и врски, Миле Јанакиески, ги запозна градежниците при Стопанската комора на Македонија. Меѓу другото, се предвидува и да се намали бројот на категории градби од пет на две и тоа во првата да влезат објектите што се од значење за државата, а во втората сите градби што досега спаѓаа во трета, четврта и петта категорија. Исто така, измените предвидуваат и укинување на одобрението за градба за помошни објекти што се во функција на објектот за домување, а се градат на иста урбанистичка парцела.

Образложувајќи ги измените, Јанакиески истакна дека се поедноставуваат постапките и целосно се укинуваат сите административни пречки. „Се сведуваме на четири чекори за нормалните градби, а за индустриските објекти-загадувачи веќе се изработува подзаконски акт со Министерството за животна средина за кои типови градби ќе се бара студија за животна средина“, рече Јанакиески.

Ставот на градежниците е дека масовно ќе се злоупотребува отсуството на задолжителен надзор при изградба на помали индивидуални објекти бидејќи тоа претставува отворена врата за дивите мајстори. Но, според министерот, контролата би ја вршел општинскиот инспектор, кој ќе треба да направи анализа дали компанијата има соодветна лиценца и дали гради во согласност со планот и одобрението за градење, кое, пак, од јуни наредната година ќе почне да се издава по електронски пат. (Б.А.)