Македонците заработуваат само 35 отсто од Европејците

Македонските граѓани заработуваат само 35 отсто од она што го заработуваат граѓаните во Европската унија. Според последните податоци на „Еуростат“, нашата држава со БДП од 35 отсто е посиромашна и од најсиромашните држави во ЕУ, Романија и Бугарија, чиј БДП изнесува 45 и 41 отсто од просекот на ЕУ.

Посиромашни од нас во регионот се само Босна и Херцеговина со БДП од 30 отсто и Албанија со најниско БДП од 27 проценти. Србија е за нијанса подобра, додека, пак, Хрватска со БДП од 64 отсто е во подобра ситуација и од шест држави-членки на ЕУ. Бројките на „Еуростат“ за 2009 година се речиси идентични како оние од 2008 година, кога нашиот БДП изнесувал 34 отсто од ЕУ-просекот.

Прелиминарните процени на „Еуростат“ за 2009 година покажуваат дека бруто домашниот производ по жител во државите-членки на Унијата се движи од 41 до 268 отсто.

Највисок БДП на жител има Луксембург, 268 отсто, делумно и поради големиот број прекугранични работници, кои се ангажирани во Луксембург. Граѓаните на Ирска, Холандија, Австрија, Шведска и Данска, Обединетото Кралство, Германија и Белгија имаат од 15 до 35 отсто повисока куповна моќ од европскиот просек. За разлика од нив, во Финска, Франција и во медитеранските држави Шпанија, Италија, Кипар и Грција се заработува 10 отсто помалку од просекот на ЕУ.

Со куповна моќ под европскиот просек се Словенија, Малта, Португалија, Словачка, а најниско на скалилото на куповна моќ на европско ниво се Полска, Литванија, Латвија, Романија и Бугарија. (М.П.)