Половина милион луѓе биле на нашиот павилјон на ЕКСПО-Шангај

Половина милион луѓе од цел свет го посе��иле македонскиот павилјон на најголемата светска изложба ЕКСПО-Шангај 2010, од нејзиното отворање на 1 мај досега. Ова на вчерашната средба со новинарите го потенцираше националниот комесар на изложбата и заменик-министер за економија, Методиј Хаџи Васков.

„Ја презентиравме Македонија како земја во која има традиција на одгледување и подготовка на квалитетно вино. Секој ден има дегустации, а кинескиот пазар е многу интересен за македонските производители“, рече Хаџи Васков. Македонија, чиј прв циклус од презентирањето на изложбата заврши, во текот на шестте месеци, од 1 мај до 31 октомври, е претставена под мотото „Урбан континуитет“. Македонскиот павилјон на изложбата е во форма на пчелино гнездо, во кое саќињата претставуваат слики од македонски културни природни и традиционални вредности и убавини.

Нашата земја првпат има павилјон изграден од 324 квадратни метри, каде што посетителите можат да ја осознаат државата. Со дигитална презентација на двоен проектор се проектираат убавините на Македонија, урбаниот континуитет, начинот на кој таа била уредувана во минатото (Стоби, Херакле��а, отоманскиот период), па се' до модерните времиња. На три различни монитори има дополнителна презентација со дел во кој Македонија е презентирана како земја на еколошка храна и вино.

Планирано е во рамките на изложбата и натаму да има дегустации на вино од Македонија, а во вториот циклус ќе се одржат презентации на туризмот и на можностите за развој на алтернативниот туризам - културен и манастирски туризам, разгледување на археолошките локалитети во државата и сите видови нестандарден, неконвенционален туризам. Покрај тоа, ќе се одржат презентации на автентични традиционални занаетчиски производи, на македонски ракотворби во смисла на филиграните, охридскиот бисер и делот за изработка на опинци, черги, везови и носии. (Ек.Р.)