Рефередум е крајна опција за уривање на ДУП „Мал ринг“
Првиот чекор е постапка пред Уставен суд, од чија одлука ќе зависи дали ќе има референдум
Деспина Трајковска
Градоначалникот Трифун Костовски се' уште не одлучил дали ќе ја искористи законската можност со собирање потписи од најмалку 20 отсто од жителите на Скопје да распише референдум на кој граѓаните ќе се изјаснат за Детаљниот урбанистички план „Мал ринг“. Ова би била крајната опција за соборување на планот во коригирана верзија, што го донесе Општина Центар, кој за градските власти е спорен оти, според нив, бил донесен спротивно на Законот за Град Скопје.
„Се' ќе зависи од конечната одлука на Уставниот суд“, категорични се градските власти, кои иницијативата за поведување постапка за оценување на законитоста и уставноста на планот, ќе ја поднесат уште деновиве, веднаш штом Општина Центар одлуката за ДУП ја објави во општинскиот !Службен гласник“. „Всушност, условно кажано, нашата борба против ДУП ќе ја тераме етапно. Доколку судот се изјасни дека планот не се коси со законите, следен чекор ќе биде Советот на Скопје да одлучи дали да се распише референдум, откако Костовски ќе го достави предлогот до советниците“, додаваат од Градот. Меѓутоа, со оглед на сомнежите на Костовски дека неговиот предлог воопшто ќе биде ставен на разгледување пред Советот, заради политичката определеност на претседавачот и на мнозинството советници кои се од редовите на владејачката партија, не е исклучена можноста градоначалникот да биде иницијатор со собирање потписи од граѓаните да распише референдум. Во тој случај, на Костовски ќе му биде потребна поддршка од малку повеќе од 100.000 граѓани, бидејќи, според статистичките податоци и со последната територијална поделба, Скопје има 506.926 жители.
Епилогот од референдумот, според Законот, ќе мора да се спроведе на дело, односно, во случај поголемиот дел од граѓаните да се изјаснат против ДУП, ниту црквата, ниту педесетината спомен-обележја, двете деветкатници и други градби предвидени на и околу плоштадот, нема да можат да се градат.
„Овие комбинации се' уште ги гледаме како далечни. Се надеваме на правична одлука на судот, дека ќе го оспори планот“, велат од Градот, додавајќи дека се убедени оти правдата е на нивна страна.
Случајот со ДУП најави дека ќе го испитува и Антикорупциската комисија. Поради сомневање дека при носењето на Планот законите биле прекршени, а процедурата неиспочитувана, ДКСК ќе испитува како е донесен ДУП „Мал ринг“. „Измените што ги донесе Советот на Општина Центар се спротивни на ГУП. Овој случај ни е од посебен интерес, бидејќи станува збор за средиштето на метрополата. Општина Центар не е изолиран дел, туку е центар на главниот град на државата“, објаснија членовите на Антикорупциската комисија кои се сомневаат дека советниците не ја испочитувале процедурата при носењето на ДУП-от, бидејќи граѓаните воопшто не биле консултирани, односно, немало јавна расправа на која тие би се изјасниле за предложените промени, како што налага законот. „Ние не го гледаме овој, како ни сите други предмети, низ партиска, верска, етничка или низ друга призма. Не сме против градење верски објекти, но мораме да водиме сметка дали се кршат законите и дали има усогласеност со волјата на граѓаните. За нас е битно да се зачува хуманиот начин на живеење. Со измените на ДУП-от го губиме плоштадот, а од еколошки аспект ќе се изгуби и циркулацијата на воздухот. За тоа не може да решаваат советници, колку и да имаат мнозинство. Ваквото однесување не зборува во прилог на доброто владеење и водење политика. Законите мора да се почитуваат и да се изградат вредносни, а не парцијални или партиски критериуми“, посочија антикорупционерите. |
