Се' уште се бара чаре за зелениот картон

Во текот на ноември Владата би требало да реши за колку ќе се намали цената на зелениот картон и дали воопшто тоа ќе се случи. Неофицијално, најпосакуваниот модел за возачите и за транспортните компани��, зелениот картон да се издава со регистрацијата на сите автомобили, со доплата од 10 евра, најверојатно, ќе отпадне од игра и нема да се усвои. Причината е што со ваквото решение би се загрозила ликвидноста на осигурителните компании.

Моментно се бараат нови модели што ќе бидат прифатливи за сите и за граѓаните и за осигурителните компании. Сега остануваат во игра опциите да се плаќа едно осигурување за во земјава, а друго за странство. Според дел од превозниците, ова би било скапо. Последната опција е годишниот зелен картон да биде приближно 50 евра и тој да им се дава само на оние на кои им е потребен, исто како и досега. Превозниците обвинуваат дека додека Владата им го штити бизнисот на осигурителните компании, нивните фирми трпат огромни штети. Додека да се најде соодветно решение, граѓаните плаќаат по 150 евра, а транспортерите и автобусите по 800 евра за годишен зелен картон. (Ек.Р.)