Тутунарите пак бараат повисоки цени

Прилеп – Се' е подготвено за откупот на тутун да почне од 15 ноември. „Мострите за откуп на тутун се заверени и комисиски запечатени, инспекцијата ќе ги провери откупните пунктови, Министерството ќе го провери бонитетот на фирмите, што значи откупот може да почне“, најави претседателот на Сојузот на тутунските здруженија на Македонија, Данчо Милески. Иако ќе го почнат откупот, сепак, откупувачите на тутун не се задоволни.

„Причина за тоа се нашите барања за повисоки откупни цени. Со анекс во договорите треба да стои: 250 денари за прва А класа, 200 за втора и 170 денари за откупен килограм трета. За ова писмено се известени фирмите- откупувачи. Ова е зашто трошоците за производство годинава нагло се зголемија, а фирмите, кога лани можеа во просек да платат по 200 денара за килограм, може и годинава солидно да го купат родот“, објаснува Милески.

На теренот ќе има 340 повереници што ќе го надгледуваат откупот, што е за 30 повеќе од лани зашто има уште еден покрај петте досегашни откупувачи. Сојузот со забелешка до откупувачите дека многу им одбиваат за тежината на саргиите при мерењето на вага. Во никој случај не треба да им одбиваат по 300 грама, туку најмногу 240 грама од саргија со која се врзани денковите тутун.

Сојузот на тутунските здруженија им препорачува на производителите да не брзаат да го носат тутунот на процена и квалитетно да ја извршуваат домашната манипулација. Сојузот на тутунските здруженија проценува дека годинашнава реколта тутун тежи околу 25.000 тони, а не како што сугерираат откупувачите околу 30.000 тони. Родот е со висок квалитет.

Од вкупно 25.000 тони тутун, 16.000 тони тутун се произведени во Прилепско-пелагонискиот регион, а околу 6.000 тони во Струмичко-радовишки регион. (МИА)