Претходен број

Фрчкоски оди каде што „гори“, Иванов до премиерот

На црковно-народниот собир во скопско Кучково по повод празникот Св. Трифун беа и двајцата претседателски кандидати, Љубомир Фрчкоски и Љубе Бошкоски, кои имаа срдечна средба

Фрчкоски кај млекопроизводителите, Иванов кај верските заедници, Ружин со дипломатите

Оливера Војновска

Две недели пред официјалниот старт на изборната кампања претседателските кандидати се раздвижуваат на теренот, а нивните настапи добиваат во интензитет.

Љубомир Фрчкоски оди онаму каде што „гори“- кај млекопроизводителите, во Миладиновци, се огласи и за проблемите со етничките смени на средношколците во Струга и со изјавата „Македонија ја заокружува својата изолација“ и' ја фрли ракавицата на ВМРО-ДПМНЕ. Од владејачката партија возвратија со остар тон: „Фрчкоски лаже“! Ѓорге Иванов се сретна со претставниците на верските заедници, стопанствениците, а по разни пригоди може да се види во друштво на премиерот Никола Груевски. Заедно се прошетаа низ улицата „Македонија“ во Скопје кога беа поставени скулптурите „Шмизла“, „Мачка“, „Девојче“. Нано Ружин досега им даде предност на дипломатите и најмногу е фокусиран на надворешната политика. Љубе Бошкоски, кој во почетокот беше најактивен, извесно време го немаше во јавноста. Од неговиот Изборен штаб соопштија дека Бошкоски бил во Виена, каде што се сретнал со високи австриски политичари и влијателни бизнисмени. Викендов тој се појави во Кучково на закројување на лозите во чест на свети Трифун, на исто место со Фрчкоски. А, Иванов беше во Тиквешијата.

Од кандидатите-Албанци најприсутен во јавноста е Имер Селмани од Нова демократија, кој прв ја објави кандидатурата, кандидатот на ДУИ, Агрон Буџаку, и единствената дама во претседателската трка, Мурише Хоџа, некако не се експонираат премногу. Тројцата говорат за модернизација на Македонија со јасна позиција кон НАТО и ЕУ.

Фаворитот на ВМРО-ДПМНЕ, Иванов, веднаш по номинацијата изјави дека „во времињата што доаѓаат ни треба слога и претседател кој ќе не' обединува“, а наредниот ден отиде по благослов кај поглаварот на МПЦ, г.�� Стефан. Тој ги посети и Исламската и Еврејската заедница, беше и на Свети Атанасиј во Тетово.

И Фрчкоски и Иванов покажаа дека се патриотски расположени, се поклонија пред моштите на Гоце Делчев. Се разбира одделно. Иванов искажа почит по владината и партиската делегација. Фрчкоски се појави со партискиот подмладок на СДСМ. Кандидатот за претседател од ВМРО-ДПМНЕ е убеден дека „Гоце би бил воодушевен од многу нешта што се случуваат во Македонија, ама би бил и тажен, бидејќи она што во негово време било присутно го имаме и денес“. За Фрчкоски посетата е интимен чин, почит кон великанот и семејната традиција. „Секогаш доаѓам овде, но не со толку камери“, им рече на новинарите.

Кандидатот на СДСМ не очекува фер избори, туку само мирни, бидејќи, како што вели, медиумите ги држи власта и нема контрола врз парите што ги дава Владата за својот кандидат. Фрчкоски не верува дека Македонија годинава ќе го прескокне шенгенскиот ѕид, тој е песимист дека земјава годинава ќе добие ослободување од визниот режим. Тој се сретна со невладината „Животна искра“ и рече дека, од позиција на претседател, ќе се залага за отворање јавни дебати за проблемите со кои се среќаваат заболените од рак, лицата со посебни потреби. На жителите на Миладиновци им препорача правен лек за нивната болка - загадувањето од рафинеријата „Окта“. „Тужете ја Владата, нема што да загубите!“, им рече тој. Неговата посета на млекарите предизвика внимание и многумина коментираа дека „онака брендиран изгледа многу неприродно кај мачните фармерски души“. На критиките од ВМРО-ДПМНЕ дека „не знаел да молзи крави“, возврати во негов стил: „Младите, нежни дечки од раководството на ВМРО, исто така, не знаат да молзат крава, тие научија многу брзо да молзат пари“.

Минатата недела Иванов и Ружин ги слушнаа проблемите на луѓето со хендикеп. И двајцата се свесни дека функцијата претседател не дозволува многу да се стори за оваа категорија граѓани. Ружин во наплив на искреност призна дека „политичарите е нормално да лажат“! Иванов беше повнимателен па рече: „Човекот ја прави институцијата, го создава амбиентот и создава можности за да се наоѓаат решенија“.

Ексдипломатот во НАТО ни откри дека е лав во хороскоп, а заштитен знак му е сонцето. Ружин изминативе денови се сретна со амбасадорите на Германија, на Франција и на Велика Британија, Улрике Кноц, Бернар Валеро и Ендрју Ки. Тој во настапите се фокусира на надворешната политика и ја критикува актуелната власт дека „води архаична политика и се потпира на стратегијата на Хунзите и на Букефал“.

Иванов возврати дека не прифаќа такви категоризации, етикети и генерализации. „Мора да го промениме нашиот досегашен однос со соседите, со регионот. Ние како дел од Балканот, дел од Медитеранот, дел од Европа, мора да водиме отворена политика, конечно да го промениме ставот за многу прашања за кои досега сме биле затворени и не сме сакале тие работи да ги споделиме со другите“, смета кандидатот на ВМРО-ДПМНЕ.

Единствената дама во претседателската трка ветува скромна кампања.

„Треба да се надминат сите несогласности што ги прават граѓаните да бидат несреќни во ова општество“, вели Мируше Хоџа, кандидат за претседател на ДПА. Селмани говори за европеизација на Македонија, за внатрешно интегрирање и интегрирање во евроатлантските структури. Вели дека патот на неговата партија е јасен и дефинитивен - кон НАТО и ЕУ. Кандидатот на ДУИ, Буџаку, вели дека тој и неговата партија секогаш се залагале за фер и демократски избори. Бидејќи „ова е многу важен тест за Македонија за евроатланските интеграции“, Буџаку апелира до сите други учесници и активисти овие избори да поминат во ред.

Ексминистерот за внатрешни работи ја објави кандидатурата од Широк сокак во Битола, само половина час по распишувањето на изборите. Бошкоски е полн со оптимизам ја очекува безрезервната поддршка на граѓаните кои го бодреа додека беше во Хаг. Тој го замрзна членството во матичната партија, но верува дека ќе ја добие поддршката од вистинските вмровци. Бошкоски во неколку наврати ја критикуваше актуелната власт за начинот на кој ја води државата. Вели дека се враќа на политичката сцена за да понуди подобри решенија за голем дел од проблемите што го мачат македонскиот народ.

Сите кандидати за претседателските избори, без исклучок, ветуваат визионерска, позитивна и европска кампања. Сепак, искуството од досегашните изборни циклуси не ни остава мног�� надежи дека партиите ќе заборават на старите манири и овој пат европски ќе се однесуваат.

Независно од содржината на пораките и од тоа што го говорат кандидатите, анкетите речиси целосно го отсликуваат расположението на јавноста кон партиите кои ги номинирале. Последната сондажа на „Рејтинг“ правена во периодот од 6 до 8 февруари, покажа дека Иванов има двојно поголем рејтинг од Фрчкоски. За Иванов би гласале 27 отсто од избирачите, за Фрчкоски - 13, за Бошкоски - 10, за Селмани 9, за Ружин и Хоџа по три отсто од испитаниците. И ова испитување на јавното мислење покажа висок степен на неопределени граѓани - 23 отсто.