Зурли, тапани и сите адети на Петровден

На 10 и на 11 јули, викендот пред Петровден, зетот Филип Шотаровски и невестата Љупка Талеска, двајцата по 27 години, ќе ја овековечат својата врска на традиционалната манифестација што се одржува секоја година во подножјето на Бистра, познатата „Галичка свадба“. Парот на 20 јуни веќе ја помина брачната „испитна“ церемонија, па сега, во духот на големиот празник, но и за радост на многубројни негувачи на галичкиот фолклор, ќе ја одржат својата голема свадбена прослава.

„Огромна чест е да се учествува на манифестацијата, а камоли да се биде зет. По пауза од две колена во моето семејство, мило ми е што јас ја имам можноста да ја продолжам традицијата“, рече идниот младоженец на вчерашната прес-конференција во „Александар палас“. „Задоволството е неизмерно. Традицијата треба да се негува. Во изминатиов период се запознав со сите обичаи, а како најинтересно нешто би го издвоила е качувањето на коњот“, изјави невестата Талеска, која за разлика од галичанецот Филип, има крушевско потекло.

На вчерашната прес-конференција организацискиот одбор на „Галичка свадба 2010“ и Месната заедница „Галичник“ ги објавија активностите, обредите и ритуалите за престојната традиционално-културна манифестација. Во саботната вечер, 10 јули, во 19 часот ќе започне прославата со китење на бајракот и фрлање пушка, пречек на топаните, кои ќе се движат кон куќата на зетот... Ќе има играње на „Свекрвино оро“, но и „Невестинското“ и „Тешкото“, симболично изведени сретсело, на Упија. Потоа, поворката од свадбари со факели и борини одат од вилата на зетот, ја земаат невестата од нејзината куќа, па се завршува на трите чешми: Секуличе, Динговиче и Упија. Надвор од свадбената церемонија, како музичка забава за присутните на манифестацијата, во 21 часот организаторот обезбеди концертен настап на македонската група „Љубојна“. Во неделното утро зетот и најблиските роднини ќе го посетат гробот на починатите, па ќе има канење на кумот, бричење на зетот, тргнување, испраќање и пречек на девојката, товарење ковчези, за, на крајот, по венчавката и ората кај Св. Петар и Павле, свадбените обичаи да завршат попладне со носење на невестата на вода и заигрување уште некое оро. Секако, откако топаните ќе ги испратат најблиските роднини, свекорот им дарува пари. Неизбежни ќе бидат зурлите, тапаните, оригиналните, стари раскошни носии во екот на духовното, фолклорното и уметничкото наследство. Според учесниците на претходната манифестација, на минатата „Галичка свадба“ имало 10.000 посетители, па, така и оваа година очекуваат многу гости, туристи, странци, но и многубројни домашни вљубеници во галичкиот белег. (Б.Ш.)